«Развитие образования», зæгъгæ, паддзахон программæйы фæлгæты Алагиры 5 æм скъола сцалцæг кодтой

2020-æм ахуыры аз Алагиры 5-æм скъолайы райдыдта ног уавæрты. Ахуыргæнæндоны бæстыхай бындуронæй сцалцæг кодтой. 610 скъоладзауæн ныр сæ бон у сæ зонындзинæдтæ уæлдæр кæнын. Скъолайы ма фæзынд уæлæмхасæн ахуырады нырыккон центр «Точка роста» дæр. Цогойты Сæрмæт фæсуроктӕ ӕрбацӕуы шахмæттæй хъазынмæ. 5-æм къласы ахуырдзау ацы студи бирæ уарзы, интеллектуалон спорты йæхи фæлвары 4-æм аз. «Точка роста» фæзынд «Современная школа», зæгъгæ, федералон проект æмæ национ проект «Образование»-мæ гæсгæ. Сывæллæтæ сæхæдæг куыд зæгъынц, афтӕмӕй ам кæрæдзиимæ фылдæр рæстæг æрвитынц æмæ уый фæрцы лымæндæр кæнынц. Шахмæтты кабинеты фарсмæ та скъоладзаутæ зонгæ кæнынц нырыккон технологитимæ. Суадзынц квадрокоптертæ, архайынц нырыккон принтертæ æмæ ноутбуктæй. Æппæт ногдзинæдтæй пайда кæнынц æнтыстджынæй. Скъоладзаутæн ацы ног фадæттæ фæзындысты бындурон цалцæджы фæстæ. Скъолайы директор Хъуппеты Азæйæ ныр дæр ма рох нæу бæстыхыйы раздæры уавæр. Арæзт æрцыди 45 азы размæ. Уæдæй нырмæ цалцæггонд никуы уыди. 2020-æм ахуыры азы райдианыл скъоладзаутæ сæмбæлдысты бындуронæй цалцæггонд скъолайы. Бæстыхайæн раивтой йæ сæр, сифтонг æй кодтой хъæугæ кусæнгæрзтæй. Алы ахуыргæнæн уаты дæр ис интерактивон фæйнæг æмæ компьютертæ. Куыстытæ æххæстгонд æрцыдысты паддзахадон программæ «Развитие образования»-йы фæлгæты. Алыхуызон проекттӕ æмæ грантты конкурсты ахуыргæнинæгтæ сæ ахуыргæнджытимæ æнтыстджынæй архайынц сæххæдæг дæр. Алагиры 5-æм скъолайы ныридæгæн ис 610 скъоладзауы. Ахуыргæнæндон æппæт нырыккон домæнтæн дзуапп кæй дæтты, уый ахуыргæнджытæн дæр удæнцой у. Уæлдай тынг цин кæнынц ног хъармдæттæн системæйыл. Куыд зæгъынц, афтæмæй-иу раздæр зымæгон бæстыхайы агъуыстыты уыд уазал. Ныридæгæн ма хъæуы бæстыхайæн йæ æттаг бакастмæ базилын, æмæ уый дæр тагъд сæ къухы бафтдзæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv