Дзæуджыхъæуы байгом 44-æм скъолайы ног бæстыхай

44-æм скъолайы ахуырдзаутæ æмæ педагогон коллективмæ ныр хæлæг кæндзысты сæ уавæрты тыххæй. Ахуыргæнæндоны æртæуæладзыгон бæстыхай байгом кæныны кадджын мадзалы архайдта республикæйы сæргълæууæг Битарты Вячеслав дæр. Скъолайы ис 550 бынаты. Сывæллæттæ йæм цæудзысты иу фæлтæрæй. Ног æмæ хъæугæ кусæнгæрзтæй ифтонг кълæстæ. Нырыккон фадæттæ ахуырадон процессæн. 44-æм скъолайы ног бæстыхайы алы хъуыддагмæ дæр лæмбынæгæй æркастысты. Æмбæлгæ уавæртæ арæзт дзы ис, се 'нæниздзинад хъыгдард кæмæн у, ахæм сывæллæттæн дæр. Фыццаджыдæр дзы ис зынгсирвæзты ныхмæ сæрмагонд нырыккон системæ. Сывæллæтæн фадат уыдзæн шаматтæй хъазынæн.  Скъоладзауты зæрдæтæ барухс кæнынæн та дзы лæууынц шахматты стыр фигурæтæ, уæдæ сæ глобус дæр чысыл нæу. Рæхсджы та ма дзы фæзындзæн, метеобудкæ кæй хонынц, ахæм бынат, боныхъæд иртасынæн. Ног уавæртæ федтой фыццаг скъоладзаутæ сæхæдæг. Раст ма æххуыс дæр кодтой скъола кадджын мадзалмæ бацæттæ кæнынмæ. Сæхæдæг куыд зæгъынц, афтæтæй тынг æнхъæлмæ кæсынц, ахуыр кæнын кæй райдайдзысты, уымæ. Скъолайы бæрæгбоны – кадджын уазджытæ. Республикæйы сæгълæууæгæн скодтой экскурси, равдыстой йын кълæстæ æмæ кусæнгæрзтæ. Актон залы та сарæзтой чысыл концерт. Зæгъдзыстæм ма уый, æмæ дзы ис 550 бынаты. Уæвгæ, республикæйы хицауад стыр æргом здахы ахуырады къабазы райрæзтмæ. Тагъд рæстæджы ма байгом уыдзæн скъола Цæлыччы. Ног скъолатæ та арæзт цæуынц Хъызлар æмæ Чермены хъæуы. Куыстытæ дзы фæуынвæнд кæнынц ацы азы кæронмæ. Уæдæ ма иу скъолайы арæзтад райдайдзæн Черноярская станицæйы дæр. Лæмбынæг цæстдард цæуы кусæнгæрзты хъæрзхъæддзинадмæ дæр. Битарты Вячеслав ма бабар кодта ахуыргæнджытæ цæттæ кæныны хъуыддагмæ дæр бæлвырд æркæсын. Скъолайы ног бæстыхайы ахуыр кæндзысты хистæртæ, 7-æй 11æм кълæсты ахуырдзаутæ. Афтæмæй дзы фæссихоры ахуыртæ нал уыдзæн, се 'ппæт дæр скъоламæ цæудзысты райсомæй. Ныридæгæн скъола цæттæ у, ахуыры процесс райдайдзæн райсом. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv