Куыстуат «Владка» садзы ног дыргъбæлæстæ

Уалдзæджы райдианæй дыргъдон «Владка»-йы куыстытæ сæ тæмæны бацыдысты. 4 азмæ куыстуат йæхи равдыста æнтыстджынӕй. 140 гектарыл зайы цалдæр хуызы фæткъуы æмæ кæрдо бæлæстæ. Куыстуат «Владка»-йы дыргъдæтты уалдзыгон куыстытæ сæ тæмæны бацыдысты. Æхсæдынц уæлдай къалиутæ æмæ садзынц ног фæткъуыбæлæстæ. Зæронд къалиутæ ралыг кæнын ахсджиаг хъуыддаг у. Афтæмæй бæлæстæ ног талатæ рауадзынц. Уый фæстæ бæлæстæ сæрдынц сæрмагонд буаргъæдтæй. Уый фæрцы зайæгойтæ фæфидар вæййынц, стæй сæм зианхæссæг зулчъытæ дæр нæ уадзы. Уæдæ къалиутæ сæ уæзæй ма æрсæттой, уый тыххæй сæм сывæрынц быцæутæ. Иу ахсджиаг къæпхæн ма - уидæгтæ слыг кæнын. Уый тыххæй тракторттыл ис сæрмагонд цыргъ гарз. Карды дæргъ у 50 сантиметры. Ацы хъуыддаджы фæрцы дæр бæлас кæны тыхджын æмæ æгæр тагъд нæ зайы. Дыргъдон йæ куыст райдыдта 4 азы размæ. Уыцы рæстæгмæ 140 гектар хъæдæй рауади æнтыстджын куыстуат. Фыццаг уал дзы зади æрмæст фæткъуы, ныр дыргъдоны парахат кæнынц кæрдобæлæстæ. Æртæ азы размæ та дзы ныссагътой сорт Сен-Жермен, зæгъгæ. Хонынц ма йæ Алагираг кæрдо дæр. Хорз тыллæг ратта æмæ йæ фарон апарахат кодтой ноджыдæр 15 гектарыл. Ныртæккæ у Цæгат Кавказы кæрдойы стырдæр дон. Уæдæ ног хуызтæ рауадзыныл дæр архайынц. Ахæм бæлæстæн сæм хицæнæй ис эксперименталон дыргъдон. Дыргъдоны разамонæг куыд бафиппайдта, афтæмæй хохрæбыны климат дыргъбæлæстыл хорзырдæм ахады. Уæлдайдæр та кæрдойыл. Уый дзурынц, ардæм консультациты тыххæй цы Бельгиаг æмæ Италиаг специалисттæ æрбацæуынц, уыдон дæр. Куыстуаты разамонæг ма куыд загъта, афтæмæй Уæрæсейы цы кæрдо фæлхас кæнынц, уымæн йæ 99 проценты у фæсарæнтæй ласт. Нæхи бæстæйы та афтæмæй æппæт уавæртæ ис. Ныртæккæ куыстуат фæнд кæны ног дыргъдон саразын. 2 къуырийы дæргъы ныссаддзысты 2 гектары кæрдобæлæстæ. Иннæ аз та йæ фæуæрæх кæндзысты 20 гектары онг. Уæд сараздзысты дыргътæ дарæн бынат 500 тоннæйæн. Уыимæ ма æвзарæн цех дæр. Уыцы хъуыддæгтæ къухы куы бафтой, уæд та фæзындзæн ног куысты бынæттæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv