Мидхъуыддæгты кусджытæн арфæйы ныхæстæ ракодта республикæйы сæргълæууæг Битарты Вячеслав

Уæрæсейы пъæлицæйæгты егъау къорды рад хæссынц Цæгат Ирыстоны мидхъуыддæгты оргæнты службæйы кусджытæ дæр. Сæ профессионалон бæрæгбоны фæдыл сын арфæйы ныхæстæ ракодта республикæйы сæргълæууæг Битарты Вячеслав. Йæ ныхæстæм гæсгæ, 10 ноябр æрмæст бæрæгбон нæу. Ацы бон хъуамæ мах, закъон æмæ барад цы офицертæ æмæ хуымæтæг кусджытæ хъахъхъæнынц, уыдонæн уæлдай кад скæнæм. Ацы бон ма æрымысæм, Мидхъуыддæгты министрады кусджытæй йæ хæс æххæстгæнгæйæ чи фæмард, уыдоны. Сæ нæмттæ æнустæм баззадысты Ирыстоны историйы æмæ, кæй цард бахъахъхъæдтой, уыцы æмбæстæгты зæрдæты. Уæлдай бузныг барадхъахъхъæнæг органты ветерантæн. Сæ кусæг балц милиционерæй чи райдыдта æмæ абон сæ фæлтæрдддзинад кæстæртæн чи не 'вгъау кæны, уыдонæн. «Уæ зын куысты ут алкæддæр æнтыстджын, хæдзары уыл уæ бинонтæ хъæлдзæгæй куыд æмбæлой, республикæйы æхсæнадон барад та алкæддæр хъахъхъæд куыд уа»-, фæнысан кодта Битарты Вячеслав йæ арфæйы фыстæджы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv