Æппæтуæрæсеон адæмон фронты регионалон штабы уæнгтæ скъолаты сбæрæг кодтой тæвд хæринаджы уавæр

Скъолаты хæрæндæтты куыстмæ нæ республикæйы цæуы бæстон цæстдард. Сывæллæтты хъарм хæринагæй куыд ифтонг кæнынц, уый базоныны тыххæй та радон рейды рацыдысты Æппæтуæрæсеон адæмон фронты минæвæрттæ. Базыдтой скъоладзауты хъуыдытæ. Сбæрæг кодтой хæринаджы хæрзхъæддзинад. Эксперттæ фыццаг бабæрæг кодтой Елхоты 3-æм скъола. Ам аходæн хæрынц, æрмæст райдиан кълæсты ахуыргæнинæгтæ нæ, фæлæ ма хистæр кълæсты æххуысцух бинонты цы сывæллæттæ хъомыл кæнынц, уыцы ахуырдзаутæ дæр. Æдæппæтæй хъарм хæринаг дæттынц 200-йы бæрц сывæллонæн. Сабиты хъæлдзæг зæрдæйы ахастмæ гæсгæ бæрæг у, абоны хæрдæй разы кæй сты. Хæринæгты хыгъд арæзт у, пайдайаг хойрæгты бæрц сывæллоны боны дæргъы хæрдæн цас хъуамæ уа, уымæ гæсгæ. Сфидар æй кодтой фæлхасгæнджыты службæйы регионалон хайады. Адæмон фронты уæнгтæ, фыццаджыдæр, сæ хъус æрдардтой куысты бынаты сыгъдæгдзинадмæ æмæ, хойрæгтæ цы ран æвæрд сты, уымæ. Æппæт лыстæгдзинæдтæм æркæсгæйæ, эксперттæ баззадысты разыйæ. Сабиты раз цы афтид тæбæгътæ ис, уый та æвдисæн у, хæринаг сын зæрдиагæй кæй цæттæ кæнынц, уымæн. Æппæтуæрæсеон адæмон фронты уæнгтæ куыд бафиппайдтой, афтæмæй, сывæллæттæ æрвылбон скъолайы цы хъарм хæринаг хæрынц, уый хорз æххуыс у ног зонындзинæдтæ æнцонтæй æмбарынæн æмæ физикон цæттæдзинад хуыздæр кæнынæн. Бабæрæг кодтой Елхоты 2-æм скъола дæр. Ам та хъарм хæринаг хæрынц райдиан кълæсты 203 ахуыргæнинаджы æмæ æххуысцух бинонты 25 сывæллоны. Æмæ кæд хæринæгты хæрзхъæддзинадмæ Адæмон фронты уæнгтæ фау не ’рхастой, уæд хæрæндоны уавæрæй сæ зæрдæ нæ баради. Бæстыхай у бындуронæй цалцæггæнинаг. 55 азы дæргъы йæм зылд нæ уыди. Уæдæ стъæлттæ, бандæттæ æмæ хæринаггæнæн ифтонгæрзтæ дæр иуылдæр сты ногтæй раивинаг. Зæрдæ сын бавæрдтой, 2022-æм азы скъола бындуронæй цалцæггонд кæй æрцæудздæн, уымæй. Уæд хæрæндоны уавæртæ дæр фæхуыздæр уыдзысты. Ныр та уал зындзинæдтæ - бирæ. Дарддæр эксперттæ бабæрæг кодтой Змейкæйы фыццæгæм скъола. Хæрæндоны хъарм хæринаг æрвылбон хæрынц фыццæгæмæй фæндзæм къласы онг скъоладзаутæ 184-æй, семæ æххуысцух бинонты сывæллæттæ 29-æй. Бæстыхаймæ æрбахизгæйæ бæрæг у, кусджытæ йæ сыгъдæг æмæ аивæй кæй дарынц уый. Фæлæ ам дæр нæй хъæугæ мигæнæнтæ. Æдасдзинады домæнтæм гæсгæ сæм разынд хицæн фарст. Скъоладзаутæ цæмæй хæрæндонмæ æрбацæуой, уый тыххæй сæ хъæуы фæндаджы сæрты хизын. Эксперттæ хъæндзинæдтæ куы рабæрæг кæнынц, уæд æнæмæнг агурынц сæ аиуварс кæныны фадæттæ дæр. Ахуыры азы райдианæй бабæрæг кодтой нæ республикæйы 80 скъолайæ фылдæр. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv