Национ проект «Ахуырад»-ы райрæзты фарстатыл æрдзырдтой Тускъаты Таймураз æмæ Людмила Башарина

Национ проект «Ахуырад»-ы райрæзты фарстатыл æрдзырдтой премьер Тускъаты Таймураз æмæ республикæйы ахуырад æмæ наукæйы министр Людмила Башарина. Республикон проекты сæйрагдæр къабæзтæ сты – математикон æмæ химикон-биологон ахуырады райрæзт. Людмила Башарина куыд радзырдта, афтæмæй ныртæккæ республикæйы архайы 29 математикон къорды, ахуыр дзы кæнынц 280 скъоладзауы. Математикон лицейы бындурыл та арæзт æрцыд 3 профилон къласы. Дзæуджыхъæуы 27-æм скъолайы, стæй районты ахуыргæнæндæттæй æхсæзы ис, хими æмæ биологи лæмбынæгæй кæм ахуыр кæнынц, ахæм профилон кълæстæ. Уыдоны цымыдисæй архайынц 270 лæппу æмæ чызджы. Уæдæ æнтыстджынæй парахат кæны уæлæмхасæн ахуырад дæр. Зæгъæм, æрмæст фарон 65 ахæм ахуырадон уагдоны сæ зонындзинæдтæ фæфылдæр кодтой 66 мин сывæллонæй фылдæр. Уыимæ ма программæ «Доступная среда»-йы фæлгæты республикæйы рæвдауæндæтты снысан кодтой логопедты æмæ дефектологты. Цы сабитимæ кусынц, уыдонæй 109 сты се 'нæниздзинад хъыгдард кæмæн у, ахæмтæ. Людмила Башарина ма загъта, ныртæккæ цы ныййарджыты фæнды сæ сывæллæтты рæвдауæндæттæм раттын, уыдон се 'ппæт дæр исынц разыйы дзуæппытæ. Республикæйы ис 685 уæгъд бынаты. Ныхас кодтой, бакусын кæуыл хъæуы, ахæм фарстатыл дæр. Зæгъæм, æрвылаз саразынц рейтинг скъоладзауты зонындзинæдтæ сбæрæг кæнынмæ. Афтæмæй, республикæйы цалдæр скъолайӕн ис тынг ныллæг бæрæггæнæнтæ. Уыцы скъолатæн снысан кодтой куратортæ. Ахуыргæнджыты зонындзинæдтæ уæлдæргæнæн институты специалисттæ та сын æххуыс кæнынц методикон æрмæгыл архайынæй. Зæгъын ма хъæуы уый, æмæ стыр æргом здæхт цæуы хистæр кълӕсты ахуырдзауты иумæйаг паддзахадон фæлварæнмæ цæттæ кæныны хъуыддагмæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv