Мæздæджы кванториумы сывæллæтты ахуыр кæнынц алыхуызон хæдтулгæтæ куыд арæзт сты, ууыл

Хæдтулгæ куыд арæзт у, уый базонын, сæрмагонд уæлæфтуан ын куыд ис скæнæн æмæ æнæпилотон тæхгæ аппарат хи къухтæй куыд ис саразæн. Ууыл ныр ахуыр кæнынц Мæздæджы кванториумы. Сывæллæтты технопарк байгом кодтой национ проект «Ахуырад»-ы фæлгæты, сентябры. Ныртæккæ дзы кусы хæдтулгæтæ аразыны лаборатори, автоквантум, зæгъгæ. Уым сывæллæтты ахуыр кæнынц нырыккон кусæнгæрзтыл. Амонынц сын, алыхуызон хæдтулгæтæй куыд пайда кæнын хъæуы, уый, стæй æнæпилотон тæхгæ аппараттæ аразыны сусæгдзинæдтæ. Мæздæджы кванториумы разамонæг Джихаты Мурад куыд фæбæрæг кодта, афтæмæй сывæллæттæн хорз фадат ис конструкторты куыстимæ базонгæ уæвын. Куысты пайда сты макеттæ æмæ модельтæ. Ахуырадон программæмæ гæсгæ, амонынц фæндаггон змæлды домæнтæ дæр. Цæмæй хæдтулгæ скъæрын дæр ахуыр кæной, уый тыххæй сифтонг кодтой картинг, конд у 4 картæй æмæ æппæт хъæугæ гæрзтæй. Афтæмæй сабиты ахуыр кæнынц куыд теорийы, афтæ практикæйы хуызы дæр. Уæ зæрдыл уын æрлæууын кæндзыстæм, Цæгат Ирыстоны ныртæккæ кусынц дыууæ технопаркы - иу Мæзæджы, иннæ та Дзæуджыхъæуы, уыимæ ма ис мобилон кванториум дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv