РЦИ-Аланийы сæргълæууæджы хæстæ рæстæгмæ æххæстгæнæг Сергей Меняйло фембæлд республикæйы цæрджытимæ

Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло фыццаг хатт фембæлд республикæйы цæрджытимæ. Адæммæ æрмæст хи фарстатæ нæй, фæлæ ма курынц, цæмæй районты сæйраг уынгтæ нывылгонд æрцæуой. Сергей Меняйло дзуапдæттæг ведомствæтæн бабар кодта, цæмæй алы курдиатмæ дæр æргом 'здæхт æрцæуа. Уæрæсейы президенты исæн уаты Цæгат Ирыстоны фыццаг хатт цæрджытимæ фембæлд республикæйы сæргълæууæджы хæстæ рæстæгмæ æххæстгæнæг Сергей Меняйло. Фембæлдмæ æрбацыдысты республикæйы æппæт районты цæрджытæ дæр. Иу иннæйы фæдыл, науæд та къордгай хизынц исæнуатмæ. Сæ фарстатæ сты алыхуызон. Чи хи курдиатимæ æрбацыд, кæйдæр иннæ горæты дзæбæхгæнæндонмæ квотæ хъæуы, бирæты та тыхсын кæнынц æхсæандон фарстатæ. Æмбырд ацыд фæткмæ гæсгæ. Архайдтой дзы министрадты минæвæрттæ æмæ районты сæргълæуджытæ. Республикæйы сæргълæууæджы хæстæ рæстæгмæ æххæстгæнæг куыд бафиппайдта, афтæмæй æппæт фарстатæ аиуварс кæнæн ис хицауады уæнгты æмгуыстады руаджы. Афтæмæй, Ногхъæуы 2 километры фæзуат хъæуы рухсдæттæн системæйæ сифтонг кæнын. Цыколайы фæндаг хъæуы сцалцæг кæнын, къæвдаты фæстæ йыл ацæуæнтæ нæй. Ахæм уавæр ма сæвзæрд Комгæроны дæр. Алагиры цæрджытæ та куыд фехъусын кодтой, афтæмæй горæты сæйраг уынгæй Црауы 'рдæм фæндагыл фистæгцæуджытæн фæндаг нæй. Сергей Меняйло байхъуыста се 'ппæт курдиæттæм дæр. Уый фæстæ бæрнон адæмæн бабар кодта, цæмæй фарстатæ аиуварс кæнынæн æмгъуыд снысан кæной. Уыимæ ма йæ гæххæттыл дæр фæнысан кæной. Республикæйы сæргълæууæджы хæстæ рæстæгмæ æххæстгæнæг фембæлды кæронбæттæны раныхасы фæнысан кодта - кæд республикæйы цæрджыты фарстатæ аиуварс кæнынæн программæтæ нæй, уæд спайда кæнын хъæуы иннæ регионты фæлтæрддзинадæй. Уазиты Зæлинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv