Алайнаг гимназы ахуырдзаутæ разæнганрд кæнынц уæлæмхасæн ахуырадмæ

Алайнаг гимназы уæлæмхасæн ахуырадмæ 'здахынц уæлдай æргом. Ныртæккæ дзы ис 14 къорды. Аивадон, техникон, музыкалон, литературон æмæ спортивон. Алы къабазы дæр сывæллæтты бон у сæхи бафæлварын. Къордты кусынц куыд иронау, афтæ уырыссагау дæр. Гимназ ифтонггонд у нырыккон техникон фæрæзтæй дæр. Робот сæмбырд кæнын æмæ йæ компьютеры программæйы руаджы æркусын кæнын. Алайнаг гимназы ахуыргæнинæгтæн уый æнцонтæй æнтысы. Ахуыр кæнынц робототехникæйы сусæгдзинæдтыл. 3-æм къласы сабитæ ацы къорды нырма мæй архайынц. Цымыдисæй хъусынц ахуыргæнæгмæ æмæ йæ алы амынддзинад дæр æххæст кæнынц. Робототехникæимæ зонгæ кæнын сабиты райдайынц 3-æм къласы. Фыццаг уал кусынц хуымæтæг роботтимæ. Дарддæр, 5-æм къласы, къæпхæнгай рахизынц зындæртæм. Ахуырты рæстæг сабитæ къордты кусынц дыгæйттæй. Робототехникæйы къордмæ сывæллæттæ æрбацæуынц компьютерыл куыст зонгæйæ. Бындурон зонындзинæдтæ райсынц информатикæйы ахуырты. Райдайынц суанг 1-æм къласы. Сывæллæттимæ кусынц иронау. 3-æм æмæ 4-æм кълæсты та иронау æмæ уырыссагау дæр. Информатикæйы руаджы сывæллæттæн сæ логикон хъуыдыкæнынад дæр хуыздæр кæны. Шахмæттæ, медиа-студи, гимнастикæ, театралон æмæ литературон студитæ, нывгæнынад, футбол, кæфтыты къорд. Гимназы ахуыргæнинæгтæн фадат ис алыхуызон сфæлдыстадон къордты сæхи бафæлварын. Æдæппæтæй сты 14. Сæ куыст арæзт у дыууæ æвзагыл. Сабиты курдиаттæ раргом кæнынæн гимназы ис æппæт хъæугæ уавæртæ дæр. Ныртæккæ гимназы ахуыр кæны 214 скъоладзауы. Алчидæр дзы фæсуроктæ архайы 3, кæнæ 4 къорды. Фидæны ма фæнд кæнынц уæлæмхасæн ахуырады рæзтыл хуыздæр бакусын. Спортивон къордты нымæц фæфылдæр кæнын. Национ хъæзтытæ спортимæ бабæттын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv