Мæскуыйы кадджын уавæры адæмы размæ рахастой Нарты кадджыты тæлмац персайнаг æвзагмæ

Нарты кадджытæ ныр бакæсæн уыдзæн персайнаг æвзагыл. Тæлмацгонд экземпляртæ равæрдтой æппæтуæрæсеон паддзахадон фæсарæйнаг литературæйы чиныгдоны. Видеобастдзинады фæрцы презентацийы архайдтой Иран æмæ Цæгат Ирыстоны наукæйы минæвæрттæ, уыимæ хицауады уæнгтæ дæр. Ирон адæмы зонды суадон æмæ царды айдæн. 500 æкземплярæй Нарты кадджытæ ныр уыдзæн бакæсæн персайнаг æвзагыл. Йæ тæлмацыл иумæйагæй бакуыстой Цæгат Ирыстоны æмæ Ираны ахуыргæндтæ. Адæмы размæ йæ рахастой Мæскуыйы фæсарæйнаг литературæйы æппæтуæрæсеон паддзахадон библиотекæйы. Мадзал кадджын уавæры байгом кодтой Пысылмон республикæ Ираны æххæстбарджын минæвар Уæрæсейы Казем Джалали æмæ Цæгат Ирыстоны хицауады сæрдары хæстæ рæстæгмæ æххæстгæнæг президенты æххæстбарджын минæвар Джанайты Барис. Джанайты Барис 400 чиныджы балæвар кодта пысылмон республикæйæн. Уыдон æрвыст æрцæудзысты сæрмагонд уæлдæр ахуыргæнæндæттæм. 100 чиныджы та рахай кодтой ирайнаг æвзагзонынад Ирыстоны парахат кæнынæн. Пысылмон республикæйы минæвар раарфæ кодта, чиныгыл чи бакуыста, уыдонæн. Чиныджы рауагъды фæдыл Дзæуджыхъæуы уыд фембæлд Цæгат Ирыстоны паддзахадон университеты ирайнаг культурæ æмæ фарси æвзаджы зонынады бæстыхайы. Цæгат Ирыстоны национ ахастдзинадты министры хæстæ рæстæгмæ æххæстгæнæг Цуциты Аслан куыд фæнысан кодта, афтæмæй нæ Цæгат Ирыстон æмæ пысылмон республикæйы ахуырадон-культрон бастдзинадтæ фæстаг рæстæг æнтыстджынæй рæзынц. Официалон хайы фæстæ библиотекæйы ирайнаг традицион музыкалон къорд «Аин» уазджыты базонгæ кодта сæ националон культурæимæ. Республикæйы цы паддзахадон программæ «Ирон адæмы националон-культурæйы райрæзт»-ыл кусынц, уымæ гæсгæ фидæны фæнд кæнынц ирон æвзагмæ ратæлмац кæнын кадæг «Шахнамэ». Иранимæ академикон бастдзинæдты райрæзтыл архайы Цæгат Ирыстоны паддзахадон университет. Университеты наукон куысты проректор Туаты Бертæ адæмы зæрдыл æрлæууын кодта, абон æмгуыст кæй кæнынц Алламе Табатабаи номыл æмæ Тегераны университеттимæ. Ахуыргæнæндæттæ æдзух кæрæдзимæ æрвитынц студеттæ æмæ ахуыргæнджыты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv