Икъаты Русланбег бабæрæг кодта сывæллæтты студи «Фæндиаг»-ы хъомылгæнинæгты

5 азы размæ Цæгат Ирыстоны байгом сывæллæтты студи «Фæндиаг». Сабиты дзы ахуыр кæнынц иронау дзурыныл. Уыимæ ма, сæ зонгæ кæнынц ирон культурæ æмæ æгъдæуттимæ дæр. Ахуыр аразынц хъазты хуызы. Сæйраг нысан – мадæлон æзваг бахъахъхъæнын. Уыцы ахсджиаг хъуыддаджы æххуыс сты хæрзгæнджытæ дæр. Сывæллæттæ ирон æвзагыл куыд æнувыд кæнынц, уый федта Дзæуджыхъæуы муниципалон сконды сæргълæууæг Икъаты Русланбег дæр. Афтæ хъæлдзæгæй сывæллæтты студи «Фæндиаг»-ы цæуынц ахуыртæ. Хъазты хуызы сабитæ базонынц иронау дзурын. Сæ зонындзинæдтæ равдыстой уазджытæн дæр. Сабиты бабæрæг кодта Икъаты Русланбег. Студийы программæ афтæ арæзт у, æмæ дзурынц æппынæдзух иронау. Ахуыр кæнынц æмдзæвгæтæ, нымайынц. Суанг ма ирон хъæзтытæ æмæ кæфтытæ дæр кæнынц. Скъолайы ахуыр кæнынц 3 азы æмæ æрдæгæй хистæр сывæллæттæ. Сæ фылдæр студимæ фыццаг хатт куы æрбацæуынц, уæд иронау æппындæр нæ фæдзурынц. Фæлæ, къуырийы фæстæ хъуыддаг зынгæ фæхуыздæр вæййы. Уый, ныййарджытæн дæр тынг æхсызгон у. Студи саразыны хъуыды разынд 5 азы размæ Габеты Аллæмæ. Проектæн йæ сæйраг хæс у ирон æвзаг бахъахъхъæнын. Скъоламæ сæ сабиты æрбахонынц, ирон æвзаг сæ мадæлон кæмæн нæу, уыцы ныййарджытæ дæр. Габеты Аллæ, сывæллæтты студи «Фæндиаг»-ы директор: «Хъыгагæн, бинонты ’хсæн дæр арæх иронау нал дзурынц. Æрыгон ныййарджыты та фæнды, цæмæй сæ сывæллæттæ дзурой иронау. Арæхдæр нæм æрбахонынц, иронау чи нæ дзуры, ахæм сабиты. Хъазты хуызы сæ ахуыр кæнæм ирон традицитæ æмæ культурæйыл дæр. Иувæрсæй кæсгæйæ, зæгъæн ис æмæ хъазты хуызы ницы бахъуыды кæндзысты. Фæлæ, сæхи ирхæфсгæйæ, ахуыргæнæгимæ æмдзæвгæтæ дзурынц, кæнæ та ирон зарджытæ кæнынц. Семæ рацæуæм уынгмæ, мæ сæ бон у адæмимæ иронау аныхас кæнын. Кæнæ, зæгъæм, чингуыты дуканимæ ацæуæм». Фыццаг азты студийы ахуыр кодтой, скъоламæ чи нæма цæуы, ахæм сабиты. Фæлæ фæстæдæр, ныййарджыты курдиаттæм гæсгæ, сарæзтой къордтæ скъоладзаутæн дæр. 2 азы дæргъы та студийы ирон æвзаг ахуыр кæнынц хистæр кары адæм дæр. Икъаты Русланбег куыд фæбæрæг кодта, афтæмæй ахæм центртæ республикæйы фылдæр куы уа, уæд æвзагæн фесæфынæй тæс нæ уыдзæн. 20 сывæллоны студийы горæты хардзæй кæй ахуыр кæндзысты, уый скъолайæн дæр у стыр æххуыс. Уымæн æмæ пандемийæ центры куыстæн æрхаста стыр зиан. Ныр ног хъомылгæнинæгтæн фадат уыдзæн мæйы дæргъы ирон æвзаг, традицитæ æмæ культурæйы сусæгдзинæдтæ базонын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv