Цæгат Ирыстоны райдыдта егъау музыкалон конкурс

189 архайæджы нæ бæстæйы алы регионтæй. Цæгат Ирыстоны райдыдта «Наши надежды», зæгъгæ, музыкалон конкурс. Æрыгон музыканттæ сæ архæстдзинад æвдисдзысты цалдæр номинацийы — фортепиано, академион æмæ эстрадон зард æмæ æндæрты. Афæдзæй-афæдзмæ æркасты архайджыты нымæц рæзы. Сæйрагдæр та уый у, æмæ мадзал æрбангом кæны, музыкæ æгæрон уарзтæй чи уарзы, уыдоны. «Бог говорит с тобой языком инструмента», зæгъгæ, кæддæр дзырдта номдзыд хъисдзæгъдæг Николо Паганини. Ацы сывæллæттæ музыканты арф хъуыдыйæн сты æвдисæн. Музыкæ у сæ царды мидис. Фортепиано, скрипкæ, саксофон æмæ сывæллæтты аив хъæлæстæ абон нотæты фæрцы аив симды бацыдысты. Сфæлдыстой цымыдисаг музыкалон уац. Ланæ кæд хæрз чысыл у æмæ фортепианойы ахæцæнтæм æххæсгæ дæр нæ кæны, уæддæр йæ лæмбынæг цагъдæй дисы æфтауы. Чызджы гыццыл зæрдæйы сæвзæрд бæллиц, – музыкæимæ иу æвзагыл сдзурын. Æрыгон музыкантты регионты 'хсæн æркаст «Наши Надежды»-йы архайы фыццаг хатт. Æмæ дзæгъæлы нæ, ныридæгæн йæ къухы æнтыстдзинæдтæ ӕфты. Уæдæ Чайковскийы номыл музыкалон скъолайы хъомылгæнинаг Лиза Васильева та йæ курдиат райсом æвдисдзæн. Ныридæгæн йæхи дысвæлдæхтæй цæттæ кæны. Уæвгæ, чызгæн музыкæмæ уарзондзинад йæ туджы ис. Йæ фыд дæр у музыкант. Ацы аз конкурсы архайы 189 сывæллоны. Се 'хсæн алы регионты минæвæрттæ. Конкурсы географи æрвылаз парахатдæр кæны. Алкæцыйы дæр дзы фæнды хи арæхстдзинадæй жюрийы уæнгты зӕрдӕтӕ балхӕнын. Тырнынц сæ æгæрон уарзондзинад музыкæмæ раргом кæнын. Ацы курдиатджын сывæллæттæ сты нæ фидæн, нæ ныфс. Ацы аз конкурс у юбилейон. Æмæ кæд иу афæдз иннæйы ивы, уæддæр æнæивгæ у иу хъуыддаг — цæсгомджынæй лæггад кæнын музыкæйæн, йæ фæрцы адæмы зæрдæты гуырын кæнын аивæй-аивдæр æнкъарæнтæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv