Цæгат Ирыстоны хуыздæр ахуыргæнæгыл банымадтой Дзæуджыхъæуы 38-æм скъолайы ахуыргæнæджы

Цæгат Ирыстоны ныр дыккаг хатт сарæзтой конкурс «Учитель года», зæгъгæ. Сæхи дзы бафæлвæрттой 30 специалистæй фылдæр. Æркасты сæйраг лæвар - фатер 2 сæдæ мин сомæн сертификатимæ. Уæлахиздзаутæн ахæм лæвæрттæ саккаг кодта Битарты Вячеслав йæхæдæг. Раарфæ сын кодта сæ æвæллад куысты фæдыл. Ахуыр кæнынц кæстæр фæлтæр, æвæрынц сæ раст фæндагыл, амонынц сын царды рæстдзинад. Сæ цæсгæмттæй мидбулхудт иу уысммæ дæр нæ сæфы. Цæгат Ирыстоны ацы аз хуыздæр ахуыргæнæгыл банымадтой Слохты Розæйы. У англисаг æвзаджы ахуыргæнæг. 10 азæй фылдæр æвæллайгæйæ кусы скъолайы. Куыд зæгъы, афтæмæй æркасты бацархайдта цымыдисæй. Сæйрагдæрыл банымадта куыд æмбæлы афтæ равдисын йæ куысты дæсныдзинад. Слохты Розæ, Дзæуджыхъæуы 38-æм скъолайы англисаг æвзаджы ахуыргæнæг: «Мæ зæрдæйы бирæ æнкъарæнтæ ис. Зæгъæн æмæ фаг бамбарын кæнæн дæр æй нæй мæ æгæрон цин. Мæхиуыл бирæ куыстон. Арфæ кæнын, мæ фарсмæ чи ’рбалæууыд, уыдонæн. Зæрдæ дарын, дарддæр мæ фæлтæрддзинад хыздæр кæй кæндзæн». Конкурсы фæлгæты, Слохты Розæ рамбылдта фатер сертификат 200 мин сомимæ. Дыккаг бынат бацахста Дзæуджыхъæуы физикон-математикон лицейы химийы ахуыргæнæг Бибоаты Татьянæ. Республикæйы сæргълæууæг Битарты Вячеслав æй схорзæхджын кодта 3 сæдæ мин сомæн сертификатæй. Æртыккаг бынаты аккагыл та банымадтой Остъаты Хетæджы. У Дзæуджыхъæуы 14-æм скъолайы истори æмæ æхсæнадзонынады ахуыргæнæг. Балæвар ын кодтой сертификат 2 сæдæ мин сомæн. Конкурс «Учитель года», зæгъгæ, ныридæгæн арæзт цæуы 2-аг хатт. Ацы аз дзы бацархайдтой 35 ахуыргæнæджы. Æркасты мадзæлттæ ацыдысты республикæйы цалдæр скъолайы бындурыл. Алы ахуыргæнæндоны дæр-иу сарæзтой онлайн-трансляцитæ. Уымæ гæсгæ алкæй бон дæр уыд фенын, æркасты хæслæврдтæ архайджытæ куыд æххæст кæнынц, уый. Слохты Розæ, Дзæуджыхъæуы 38-æм скъолайы англисаг æвзаджы ахуыргæнæг: «Бацархайыны фадат дзы уыдис алкæмæн дæр. Нæ республикæйы ис бирæ фæлтæрдджын æмæ дæсны специалисттæ. Æппæт нæ архайынц алыхуызон æркастыты. Фæлæ ахæм æркасты архайыд дæтты стыр фæлтæрддзинад. Фидæны, æнæмæнг, бахъæудзæн. Зын куыннæ у, фæлæ у тынг цымыдис». Уыцы бынаты ма схорзæхджын кодтой «Воспитатель года» æмæ «Педагогический дебют», зæгъгæ, профессионалон дæсныдзинады æппæтуæрæсеон æркастыты регионалон æмвæзады уæлахиздзауты. «Педагогон дебют»-ы æркасты фæуæлахиз Заманхъулы скъолайы истори æмæ æхсæнадзонынады ахуыргæнæг Багаты Ибрагим. Саккаг ын кодтой 100 мин сомы. Хуыздæр хъомылгæнагыл та банымадтой Беслæны 3-æм рæвдауæндоны кусæг Хуыцъистаты Заремæйы. Ахуырады райрæзтмæ цæст дарыныл нæ республикæйы разамынд архайдзæн дарддæр. Уый тыххæй та æрыгон специалисттæм уыдзæн сæрмагонд каст. Афтæмæй, ахуырады системæ хæрзхъæддæр æмæ фидардæр кæндзæн. Пелиты Сæбинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv