Цæгат Ирыстоны дæр дарддæр цæуы коронавирусы ныхмæ вакцинаци

Куыд æппæт Уæрæсейы, афтæ Цæгат Ирыстоны дæр дарддæр цæуы вакцинаци. Барвæндонæй прививкæ скæныны фадæттæ аразынц республикæйы районты цæрджытæн. Се ‘хсæн – Æрыдоны район. Æрвылбон Николаевская станицæйы дæр вакцинаци ацæуынц 20 адæймаджы онг. Ам февралæй нырмæ прививкæ скодтой 365 адæймагæн. Николаевская станицæйы цæрæг Зæлинæ Канищева бирæ азты дæргъы кусы сывæллæтты рæвдауæндоны. Прививкæ скæнынвæнд рагæй кодта. Абон райста «Спутник V»-йы фыццаг компонент. Æртæ къуырийы фæстæ ацæудзæн вакцинацийы дыккаг хай. Йæ ныхæстæм гæсгæ, йæ нæ уырны, æвзæрырæм ыл сахаддзæн, уый. Вакцинæ 2-аг хатт скæнынмæ æрбацыдысты, фарон æй чи скодта, ахæм адæм дæр. Пётр Бугарёвæн ноябры скодтой «ГамКовидВак»-ы дыууæ хайы дæр. Йæхи хорз æнкъардта, не схызт йæ тæвд дæр. Ныр ногæй æрбацыд прививкæ скæнынмæ, мæ кæстæрты ма фæрынчын кæнон, зæгъгæ. Куыд зæгъы, афтæмæй йæ бинонтæй æппæт дæр ацыдысты вакцинаци. Николаевская станицæйы амбулаторийы вакцинаци цæуы 15-æм февралæй. Уæдæй нырмæ йæ скодтой 365 цæрæгæн. Абон сæм бафтыд 20 адæймаджы. Дыккаг компонент чи скодта, уыдонæн та радтой сертификаттæ. Прививкæ скæныны бар ис æрмæст бынæттон цæрджытæн нæ, фæлæ уазджытæн дæр. Æрмæст развæлгъау хъæуы уыцы фæндон фехъусын кæнын бынæттон дохтырæн. Бынæттон цæрджыты ныхæстæм гæсгæ, коронавирусы ныхмæ прививкæ скæнын кæй фæнды, уыдоны нымæц фæстаг рæстæг зынгæ фæфылдæр. Вакцинæ райсæн ис нæ республикæйы æппæт районты дæр, уыимæ ма дæрддзæф хъæуты. Цыфæнды афон дæр ис хи ныффыссæн паддзахадон лæггæдты порталы. Дзукъаты Элладæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv