Национ проект «Здравоохранение» йы фæлгæты Црауы амбулатори цалцæг кæнынц

Црауы бындуронæй цалцæг кæнынц бынæттон амбулоатори. Куыстытæ æххæст кæнынц федералон программæйы фæлгæты. Медицинон куыстуат байгом уыдзæн фыццæгæм сентябры. Уыцы цаумæ æнхъæлмæ кæсынц, куыд хъæуы цæрджытæ, афтæ дохтыртæ дæр. Гæззаты Зæринæ федта куыстытæ цавæр къæпхæныл сты, уый. Црауы хъæуы национ программæ «Здравоохранение»-йы фæлгæты бынæттон амбулаторийы бындурон цалцæджы куыстытæ сæ тæмæны бацыдысты. Амбулаторийæн бындур сæвæрдтой 1987 азы. Уæдæй-абонмæ цалцæггонд никуы 'рцыд. Ныридæгæн дзæбæхгæнæндоны сног кодтой электрон тыхы телтæ, ногтæй раивдтой хъармгæнæн æмæ канализацийы хæтæлтæ. Сæвæрдтой рудзгуытæ дæр. Бæстыхайæн нывыл кæнынц куыд йе 'ддаг бакаст, афтæ мидæггаг куыстытæ дæр æххæст кæнынц. Арæзтадон организаци «Русь»-ы специалисттæ куыд зæгъынц, афтæмæй кусджытæ архайынц, нырыккон домæнтæн дзуапп чи дæтты, ахæм хæрзхъæд æмæ фидар æрмæджытæй. Медицинон уагдон ног цалцæджы фæстæ йæ дуæрттæ байгом кæндзæн 1 сентябры. Хъæуы цæрджытæ æмæ дохтыртæ уыцы бонмæ тынг æхсызгонæй æнхъæлмæ кæсынц. Раздæр ам медицинон лæггæдтæ æххæст кодтой тæссаг уавæрты. Бæстыхайы къултæ кæм хъуына, кæм та згъæлгæ кодтой. Уæдæ-иу амбулаторийы кусджытæ æрбамбырд сты иу уаты уазӕлтты сӕхи батавынмӕ; хъармгæнæн гарз-иу бакодтой, афтæмæй лæггад кодтой хъæуы цæрджытæн. Пациенттæн стационары баххуыс кæныны фадат бæстыхайы нæ уыд. Ныр дзы фæзындзæн райдзаст палатæтæ. Хъæуы цæрæг Магкоты Таймураз æрвылбон ардæм æрбацæуы, куыстытæ куыд цæуынц, уый фенынмæ. Æнхъæлмæ кæсы ног уавæртæм. Цалцæггæнæн куыстытыл цин кæны хъæуы цæрæг Болататы Зæлинæ дæр. Хорз хъуыды кæны, æртын азы размæ ацы амбулатори куы байгом, уый. Дохттыртæ уæдæй-абонмæ цæрджытæн цы хæрзты бацыдысты, уый зæрдыл дары, аргъ сын кæны.Райгонд у, ныр уыдон цæстуарзон æмбæлгæ æххуыс хорз уавæрты кæй кæндзысты, уымӕй. Амбулаторийы дохтыр Гуӕцæлты Валерий дæр тынг лæмбынæг кæсы куыстыты хæрзхъæддзинадмæ. Дохтыры цæстæнгасæй ницы ирвæзы, куыстытæ йæ зæрдæмæ цæуынц, фау йæ бон æрхæссын ницæмæ у. Куыстытæ нысангонд рæстæгмæ æххæстгонд æрцæудзысты, уæддæр-ма дзы, йæ хъуыдымæ гæсгæ, ис ахæм фиппаинæгтæ, кæцытæ аиуварс кæнын хъæуы рагацау, цæмæй сыл уый фæстæ зæрдæ ма рисса. Национ проект «Ахуырад»- ы фæлгæты ма Црауы цалцæг кæнынц скъолайы спортивон зал дæр. Ам куыстыты фылдæр хай ныридæгæн сты конд. Зæгъæн ис, æмæ куыстытæ кæронмæ фæхæццæ кæнынц.Спортивон фæзæй уæлдай-ма ам сцалцæг кодтой уæлæдарæс ивæн бынæттæ. Скъолайы разамынд дæр сæ цин не`мбæхсы. Ахуыргæнæндоны директор Коциты Жаннæйы ныхæстæм гæсгæ, Црауы хъæуы ис, спортыл æнувыд чи у, бирӕ ахæм фæсивæд. Уымæ гæсгæ, ам цы куыстытæ цæуынц, уыдон æхсызгондзинад хæссынц алкæмæндæр. Зæгъын хъæуы уый дæр, æмæ амы куыстытæ кӕй фæуыдзысты июны. Уый та у уæлдай бузныджы аккаг, уымæн æмæ а сæрд сколадзаутæ цæудзысты скъолайы лагерьмæ. Уымæ гæсгæ ахуыргæнджыты куыст нæ фæкъуыымпы уыдзæн, ӕмӕ сӕ бон уыдзӕн аразын алхуызон спортивон хъæзтытæ, ерыстæ. Сабитæ пайдаимæ æрвитдзысты сæ уæгъд рæстæг. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv