Цыколайы культурæйы галуан байгом бындурон цалцæджы фæстæ

Аивады бæрзæндтæм схизынæн фылдæр фадæттæ фæзынд Цыколайы сывæллæттæн. Ам бындуронæй сцалцæг кодтой культурæйы хæдзар. Ныр сфæлдыстадон къордтæн ис æппæт уавæртæ сæ арæхстдзинад хуыздæр кæнынæн. Райдзаст зал, ног сценæ æмæ агъуыстытæ. Банывыл кодтой бæстыхайы алфæмбылай дæр. Культурæйы артдзæст федта нæ уацхæссæг дæр. Цыколайы культурæйы галуаны ис 19 аивадон къордæй фылдæр. Бæстыхай бындуронæй сцалцæг кодтой национ проект «Культура»-йы фæлгæты, æмæ афæдзы размæ ног агъуыстытæ сæ дуæрттæ байгом кодтой мин сабийæн. Культурæйы галуаны фидыц – театралон къорд «Хуры тын». Æрыгон актертæн спектаклтæ æвæры Аркъауты Джульеттæ. Аивадон разамонæг йæ хъомылгæнинæгтимæ иу æмæ дыууæ хатт не систы уæлахиздзаутæ фестивальтæ æмæ алыхуызон æркастыты. Уымæй уæлдай, алы къуыри дæр хъæуы цæрджыты зæрдæтæ барухс кæнынц хъæлдзæг равдыстытæй. Цыколайы культурæйы артдзæсты цалцæгмæ йæ кусджытæ рагæй æнхъæлмæ кастысты. Ныр сæ фæндтæ сæххæст сты – галуан и фтонггонд у хъæугæ техникæйæ, музыкалон инструменттæй. Иу ныхасæй, ис дзы алы фадæттæ дæр аивадон куыст кæнынæн. Национ проект «Культура»-йы фæлгæты ныртæккæ дарддæр дæр цалцæг кæнынц æмæ аразынц культурæйы хæдзæрттæ. Нæ республикæйы Культурæйы министрады нысанмæ гæсгæ, алы дард хъæуы дæр хъуамæ уа æппæт фадæттæ аивадон куыст кæнынæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv