Фыдæлтæй баззайгæ дæсныйад

Цæгат Ирыстоны æрмдæсныйады центр кæд цыбыр рæстæг кусы, уæддæр æй æрмæст республикæйы нæ, фæлæ ма сыхаг регионты дæр. Уымæй уæлдай ма цымыдисаг у туристтæн дæр. Центры кусджытæ æрвылбон архайынц, цæмæй ацы бынат адæмы зæрдæтæ рухс кæна. Уæдæ равдысты фенæн ис нæ республикæйы раззагдæр æрмдæсныты куыстытæ дæр, сæ иу Байцаты Валерий. Йæ фæлтæрддзинад не вгъау кæны. Ахæм куысты руаджы национ æрмдæсныйадæн фесæфынæй тас нæу. Æрмдæсны Байцаты Валерий - Цæгат Ирыстоны аивæдты училищæйы рауагъдон - йæ фыццаг куыстытæ скодта 36 азы размæ. Уыдон уыдысты лæвæрттæ Ног азы бæрæгбонмæ. Куыд зæгъы, афтæмæй ацы дæсныйадыл сахуыр кæнын зын нæу, фæлæ аивады сæйрагдæр уый нæу. Ахсджиаг у дунемæ кæсын нывгæнæджы цæстæй алы куысты мидæг дæр равдисын дæ миддуне. 2000-æм азæй Байцаты Валерий у нæ республикæйы нывгæнджыты цæдисы уæнг, кусы педагогон институты дæр. Йæ аивады лыстæгдзинæтдæ амоны йе `нæниздзинад хъыгдæрд кæмæн у, уыцы сывæллæттæн дæр. Цæгат Ирыстоны æрмдæсныйады центримæ æмгуыст кæны йæ байгомæй нырмæ. Ам равдыстытæй йæ куыстытæ ист никуы æрцæуынц. Центры кусджытæ куыд зæгъынц, афтæмæй сæ æрбацæуджытæн амонын дæр нæ хъæуы. Алкæмæндæр сты зонгæ. Æрмдæсны йæхæдæг дæр центр арæх бабæрæг кæны. Ацы бынат бирæ курдиатджын адæмæн у уарзон. Ам сæмбæлынц, базонгæ вæййынц. Уæдæ кæрæдзийæн сæ куысты сусæгдзинæдтæ дæр раргом кæнынц. Куыд зæгъынц, афтæмæй ацы бæстыхайы иу дзаума дæр нæй, цæмæй йыл лæмбынæг ма æрныхас кæной æмæ йе `скæнæджы ма бафæрсой, цы мидис дзы хъавыди рахыссын дзыллæмæ. Уый та уымæн, æмæ сæ фæнды, цæмæй национ æрмдæсныйæдтæ ма фесæфой. Арæх скæнынц дæсныйад æвдисæг ахуыртæ дæр. Æрбацæуынц уазджытæ сыхаг республикæтæй дæр. Кыд зæгъынц, афтæмæй сын стыр ныфс у, сæ куыстæн сын адæм стыр аргъ кæй уæнынц, уый. Керамикæйы куыстæй уæлдай ма центры ис хъæдæй, дурæй, алы згъæртæй æмæ бирæ æндæр хуызы куыстытæ. Йæ дуæрттæ гом сты куыд профессионалон æрмдæснытæн, афтæ хæдахуыртæн дæр. Ныртæккæ дзы архайы 83 æрмдæсныйы. Сæ экспонаттæ баст сты нæ рагфыдæлты культурæ æмæ традицитимæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv