Стадион «Спартак»-ы дарддæр цæуынц цалцæггæнæн куыстытæ

Рацарæзты фæстæ республикон стадион «Спартак»-ы трибунæты бынат уыдзæн 14 мин адæймагæн. Цалцæггæнæн куыстытæ ныртæккæ сты сæ тæмæны. Цæуынц къæпхæнгай. Зæгъæм, рог атлетикæйы чи архайы, уыцы спортсментæн сног кодтой тезгъогæнæн фæндæгтæ. Нырма уал стадион «Спартак»-ы нæ хъуысынц футболуарзджыты хъæлæстæ. Æрмæст арæзтадон техникæйы уынæр. Сæ тæмæны дзы бацыдысты цалцæггæнæн куыстытæ. Ныртæккæ халынц хурныгуылæны 'рдыгӕй стадионы хай. Специалисттæ фидарæй зæгъынц, конструкци суыдзæн бирæ азты фаг. 14 минæй фылдæр адæймаджы бон уыдзæн хурныгуылæн æмæ хурыскæсæн трибунæтæй кæсын сæ уарзон командæты хъæзтытæм. Уыдзæн дзы бынæттæ, йе 'нæниздзинад хъыгдæрд кæмæн у, уыдонæн дæр. Сæвæрдзысты дзы сæрмагонд гарз инвалидты уæлæмæ сисынæн. Ног домæнтæм гæсгæ трибунæтæ бауромдзысты зæххæнкъуысты 9 баллы амлитудæимæ. Бахъуаджы, бадæн бынæтты нымæц фæфылдæр кæндзысты. Стадионмæ æрбаластой ног табло. Дзуапп дæтты премьер-лигæйы æппæт техникон домæнтæн дæр. Экран сæвæрдзысты стадионы хуссарварсы. Стадион цалцæг кæнын райдыдтой физкультурæ æмæ спорты рæзты программæйы фæлгæты. Куыстытыл бахардз кæндзысты 1 миллиард æмæ 700 милуан сомы. Фыццаг хъазт нограцарӕзт стадионы кæд уыдзæн, уый ныр ма бæрæг нæу. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv