Мæздæджы районы фермертæ сæ хортыды фæзуæттæ донкалæн гæрзтæй пырх кæнын райдыдтой

Сæрдыгон тæвд бонты уарынтæм хъæууон-хæдзарадон кусджыты æнхъæлмæ кæсын нал хъæудзæн. Мæздæджы куыстуат «Заря»-йы лыггæнинаг фарста аиуварс кодтой ног техникæйы 'руаджы. Субсидийы æххуысæй балхæдтой сæрмагонд донпырхгæнæн конструкци. Ацы конструкцийы руаджы машинæ иу цыдæн дон пырхгæнгæйæ стырдæр фæзуатыл аххæсы. Бызырты хуызæн ыл цы ифтонггæрзтæ ис, уыдоны фæрцы. Сæ дæргъ фæйнæ 410 метры. Хъæууон-хæдзарадон машинæ арæзт у Саудаг Аравийы. Йæ аргъ у 24 милуан сомы. Фæлæ сæрмагонд программæйы фæлгæты куыстуатæн рахай кодтой субсиди 16 милуан сомы хъæугæ мигæнæн балхæнынæн. Резван Абуков, хъæууон-хæдзарадон кооператив «Заря»-йы сæрдар: «Ацы аз байтыдтам нартхор 160 гектары. Иннæ аз ма 2 пырхгæнæн машинæйы балхæндзыстæм. Уæд нæ бон суыдзæн 190 гектары фылдæр зæхх бакусын. 2023-æм азы та ма йæм бафтаудзыстæм 160 гектары». Хъæууон-хæдзарадон кооператив «Заря»-йы æрвылаз æрзайын кæнынц хоры æмæ техникон культурæтæ. Куыстуаты зæххытæ сты 3500 гектары бæрц. Раздæр-иу зæрдæ дардтой, къæвда æруардзæн, зæгъгæ. Ныр ног конструкцийы æххуысæй сæ тыллæг боныхъæдæй аразгæ нал у. Резван Абуков, хъæууон-хæдзарадон кооператив «Заря»-йы сæрдар: «Пырхгæнæн машинæмæ дон цæуы зæххы бынæй. Уый тыххæй сарæзтам канал. Лæууы дзы донцъирæн. Афтæмæй цыбыр рæстæгмæ нæ хортыд бапырх кæнæм. Тынг æххуыс нын у ацы кусæнгарз. Ныридæгæн дзы 2 хатты спайда кодтам». Мæздæджы районы зæххытæ донхорыггæнæн фарста бирæты тыхсын кæны. Сæрдыгон дзы кæддæриддæр иннæ районтæй тæвддæр вæййы. Ам советон дуджы дæр зæххыты 60% сæрмагонд кусæнгæрзтæй пырх кодтой. Уый фæстæ сын ахæм фадат нал уыд. Ныр та район ногæй мелиорацимæ здæхын райдыдта. Æлхъацаты Зауыр, РЦИ-Аланийы хъæууон-хæдзарадон управленийы Мæздæджы районы хайады разамонæг: «2019-æм азы ног кусæнгæрзты æххуысæй бакуыстам 700 гектары. Фарон 1000. Ацы аз та 3000 гектары. Афтæмæй абон пырхгæнæн машинæйы æххуысæй бахуылыдз кæнæм 4700 гектары зæххытæ. Фидæнмæ сæ хъуамæ 8000 гектары онг фæфылдæр кæнæм». Мæздæджы районы ис 150 хъæууон-хæдзарадон куыстуаты. Уыдонæй аст архайынц Хъæууон хæдзарады донхорыг зæххыты программæйы. Ныридæгæн бирæ фермертæ субсиди райсынмæ курдиæттæ балæвæрдтой. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv