Цæгат Ирыстоны бирæвæрсыг центрты куысты æххуыс кæндзæн аразгæ интеллект

Паспорт райсын, зæхх кæнæ хæдзарæн æмбæлгæ гæххæтытæ бацæттæ кæнын. Сывæллоны скъоламæ хыгъды бафыссын. Ахæм æмæ æндæр лæггæдтæ райсæн ис бирæвæрсыг центры. Афæдзæй-афæдзмæ сæ нымæц кæны фылдæр. Цæгат Ирыстоны бирæвæрсыг центртæ ныридæгæн кусынц 8 азы. Ныртæккæ бирæвæрсыг центры райсæн ис 283 лæггады. 68 дзы сты федералон, нæуæдз - регионалон. 2016 азимæ абаргæйæ республикæйы цæрджытæ центрты цы лæггæдтæ райстой, уыдоны нымæц дыууæ хатты фæфылдæр. Фидæны та центрты специалисттæн сæ куысты æххуыс кæндзæн аразгæ интеллект. Афтæмæй центры архайды хъомыс фæфылдæр уыдзæн. Фæлтæрддзинадæй хъæздыг кæныны тыххæй нæ республикæ æмгуыст кæны Ханты-Мансийскы автономон округимæ. Регион нымад у нымæцон технологиты рæзтмæ гæсгæ раззагдæртæй иуыл. Фæсарæнтæм ацæуынæн биометрион паспорт райсæн ныр уыдзæн æнцондæр. Августы Дзæуджыхъæуы бирæвæрсыг центры фæзындзæн криптобиокабинæ. Техникон фæрæзы руаджы 15 минутмæ сисæн уыдзæн къам, æнгуылдзты фæдтæ æмæ æмбæлгæ гæххæттытæ сæмбырд кæнын. Ацы хæс баххæст кæныныл æнгомæй кусынц мидхъуыддæгты министрадимæ. Бирæвæрсыг центры лæггæдты хæрхъæддзинадмæ æппынæдзух управленийы сæ цæст дарынц. Разыйæ чи нæ баззад, уыдоны бон сæ хъаст ныууадзын у сæрмагонд уæлæфтуанæй спайда кæнгæйæ. Госуслуги-жалобы, зæгъгæ. Адæмы курдиæттæ фæзынынц сæрмагонд картæйыл. Йæ цæст æм дары куыд республикæйы сæргълæууæг, афтæ Уæрæсейы президент дæр. Уæдæ сæ куысты сæйраг хæс адæмимæ кусын та управленийы специалисттæн у æмæ йæм се `ргом уæлдай бæстон здахдзысты. Хуасадзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv