Цæгат Ирыстонмæ Пензæйæ ссыдысты кардиологтæ, кардиохирургтæ æмæ онкологтæ

Кардиологтæ, кардиохирургтæ, стæй онкологийы специалисттæ ссыдысты Цæгат Ирыстонмæ Пензæйæ. Сты зæрдæйы æмæ дадзинты хирургийы федералон центры специалисттæ. Сывæллæтты республикон клиникон рынчындоны æркастысты чысыл пациенттæм. Йе 'нæниздзинады уавæрмæ гæсгæ Пензæйы дзæбæх кæнын кæй хъæуы, уыцы сабиты номхыгъд снысан кодтой. Дохтырты æркаст ацыдысты лæвар. Уæвгæ, Пензæйы специалисттæ Цæгат Ирыстонмæ ссыдысты фыццаг хатт. Сæ ахæм цыд фæпайда уыдзæн канд пациенттæн нæ, фæлæ ма дохтыртæн дæр. Кæрæдзийæн фæхай кæндзысты сæ фæлтæрддзинадæй. Алексей Черногривов, Пензæйы зæрдæйы æмæ дадзинты низты федералон центры кардиохирург: «Уый бæрц пациентты уынынвæнд нæ кодтам. Фæлæ ныридгæн бæстон æркастыстæм, зæрдæйы низимæ чи райгуырд, 50 ахæм сывæллонмæ. Ирыстоны уыдзыстæм Цалдæр боны. Абон стæм Дзæуджыхъæуы, райсом та абалц кæндзыстæм Мæздæгмæ». Медицинон десант Ирыстонмæ ссыд æнæниздзинад хъахъхъæныны министр Годжыцаты Тамерланы хъæппæрисæй. Сывæллæты ныййарджытæн ацы мадзалæй разыйæ баззадысты. Буыкуылты Маринæ, Дзæуджыхъæуы цæрæг: «Мах нæхи дзæбæх кæнæм 1-æм поликлиникæйы, æмæ нын уым нæ дохтыр загъта, Ирыстонмæ нæм ахæх специалисттæ кæй ссæудзысты, уый тыххæй. Мæ сывæллоны зæрдæ операцигонд у. Æмæ мæ фæндыдис, цæмæй йæ ацы дохтыртæ дæр феной». _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv