Сител: Во екот на празничното пазарување, расте бројот на поплаки за неисправни производи

Измени на Законот за заштита на потрошувачите и пред се зголемување на гарантниот рок бараат надлежните. Во екот на празниците каде потрошувачката е во преден план расте и бројот на поплаки од граѓаните. Надлежните посочуваат дека задолжителната гаранција од 6 месеци е многу краток период, а техничките апарати обично се расипуваат после половина гоидина. Товарот за поправка паѓа на потрошувачите. Поради ова од надлежната организација бараат минималната гаранција да се зголеми на 9 месеци. Од 3000 поплаки годинава, најголем број, односно 371, биле поради неквалитетни производи односно производи под гаранција и сервисирање. Освен потрошувачите со проблеми се соочуваат и компаниите. Големите дистрибутери се борат со нелојална конкуренција. Помалите дистрибутери на технички апарати и други производи ги нудат по пониска цена наводно истите производи. Најчесто по истекот на гаранцијата тие веднаш се расипуваат. Со измените на законската регулатива надлежните ќе бараат и измени во делот на сервисирањето, означувањето на цени како и распродажбата. Најголем дел од поплаките годинава се од техничките апарати. По нив следат жалбите од јавните односно телекомуникациските услуги. Расте и бројот на поплаки по маил и социјалните мрежи, со што граѓаните очекуваат побрзо решавање на случаите.