Цæгат Ирыстоны пульмонологон центры фæзындзæн ног медицинон кусæнгæрзтæ
Цæгат Ирыстоны Уæллаг Фыййагдоны республикон пульмонологон центрмæ се`нæниниздзинад фæхъæддыхдæр кæнынмæ æмæ рæуджыты низ сдзæбæх кæнынмæ æрцæуынц республикæйы цæрджытæ дæр, нæ бæстæйы иннæ регионты минæвæрттæ дæр. Фæлæ медицинон центры хъæуы цапцæггæнæн куыстытæ бакæнын, ног кусæнгæрзтæй сифтонг кæнын. Рынчындоны уавæрмæ æркаст нæ республикæйы сæргълæууæджы хæстæ рæстæгмæ æххæстгæнæг Сергей Меняйло. Уæллаг Фыййагдоны республикон пульмонологион центрыл цæуы 45 азæй фылдæр. Уæдæй-абонмæ дзы бындурон цалцæггæнæн куыстытæ иу хатт дæр нæ уыд. Кæд æмæ рынчындон æмбæлгæ уавæртæй æххæст нæу, уæддæр сæ куыст иу уысммæ дæр не`рлæууыд. Ам суазæг кæнынц канд нæ республикæйы цæрджыты нæ, фæлæ ма нæ бæстæйы иннæ регионты минæвæртты дæр. Вадим Демидов æрцыд Мæскуыйæ. Бирæ азты дæргъы хъæрзы рæуджыты низæй. Йæхæдæг куыд зæгъы, афтæмæй, ацы центры цы дзæбæхгæнæн мадзæлттæ ацæуы, уыдон ын тынг фæахъаз вæййынц. Тебиаты Зирæт ныр 11 азы дæргъы 6 мæйæ 6 мæймæ йæ улæфæнтæ дзæбæх кæны ам. Уыимæ тынг райгонд у дохтырты куыстæй. Æмæ кæд дохдырты куыстмæ аипп зын æрхæссæн у, уæд цы уавæрты кусынц æмæ рынчынтæн цы фадæтты æххуыс кæнынц, уыдон сты зæрдæхсаинаг. Фæлæ медицинон уагдоны лыггæнинаг фарстатæ ууыл нæ фæвæййынц. Нырмæ рынчындон æххæст нæу рентнген аппаратæй, физиотерпевтон кусæнгарзтæй æмæ спирографæй. Хъæуы сæ ногтæй баивын. Дзырдæн зæгъæм, спирограф ныр цалдæр мæйы дæргъы нæ кусы. Фыййагдоны центр бабæрæг кодта нæ республикæйы сæргълæууæджы хæстæ рæстæгмæ æххæстгæнæг Сергей Меняйло, бафæндыд æй хи цæстæй фенын рынчындоны уавæр. Рынчындоны кусæнгæрзтæ ногтыл баивынæн республикон бюджетæй рахай кæндзысты 23 милуан сомы. Ацы ногдзинæдтæ куы фæзыной центры, уæд æмбæлгæ анализтæ раттынмæ дард цæуын нæ хъæудзæн. Скæнæн сæ уыдзæн ацы медицинон центры. Хæстæдæр рæстæг ацы фарста лыггонд æрцæудзæн, æмæ пульмонологон центры кусджытæн сæ бон уыдзæн нæ республикæйы цæрджытæн æмæ уазджытæн хæрзхъæд медицинон æххуыс бакæнын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv