РЦИ-Аланийы сæргълæууæг Сергей Меняйлойы разамындæй ацыд аппаратон æмбырд

Дистанцион хуызы ахуыры фæткмæ раивын республикæйы скъолатæ æмæ техникумтæ. Ахæм уынаффæ аппаратон æмбырды рахаста регионы разамонæг Сергей Меняйло. Коронавирус кæмæ рабæрæг, уыцы сывæллæтты нымæц 3 хатты фæфылдæр. Уæдæ республикæйы педагогты 12% дæр сты ковидæй рынчынты 'хсæн. Уымæ гæсгæ Сергей Меняйло бабар кодта сног кæнын сæрмагонд сервис «Учитель на замену»-йы архайд. Фæкæсинаг бинонтæн, раздæрау, дæттын хойрæгты чыргъæдтæ. Цавæр фарстатыл ма æрныхас кодтой аппаратон æмбырды, уый тыххæй радзурдзæн Дзæдзойты Фатимæ. Республикæйы скъолатæ æмæ техникумтæ 25-æм январæй дистанцион хуызы ахуыры фæткмæ раивын. Уæлæмхасæн ахуырады уагдæттæ карантины сæхгæнын. Сывæллæтты рæвдауæндæтты санитарон домæнтæ фæкарздæр кæнын. Ахæм хæс республикæйы сæргълæууæг Сергей Меняйло аппаратон æмбырды сæвæрдта дзуапдæттæг министрад æмæ ведомствоты разамонджыты размæ. Коронавирус æмæ æхснырсæгæй рынчынтæ бирæ сты куыд ахуырдзаутæ, афтæ ахуыргæнджыты 'хсæн дæр. Иуæй-иу уагдæтты уыцы бæрæггæнæн 40% онг хæццæ кæны. Аппаратон æмбырды ма ныхас цыд Алагиры хъæды хæдзарады техникум Æрыдоны училищæйы бæрнæй сисыныл. Йæ уавæртæм ын æркæсын æмæ йын йæ бындурон цалцæджы фарстатыл бакусын. Хицауады уæнгтæ ма фæнысан кодтой, Беслæны 8-æм скъолайы хъармгæнæн системæйы къуылымпытимæ кæй кусы, уый. Рахизфарсы районы разамонæгæн Сергей Меняйло бабар кодта фарста цыбыр рæстæгмæ аиуварс кæнын, цæмæй скъолайы хъармгæнæн системæ, куыд æмбæлы, афтæ куса. Эпидемиологон уавæрыл дзургæйæ, республикæйы сæйраг санитарон дохтыр Тыбылты Алан куыд радзырдта, афтæмæй ивгъуыд къуыри Ковид кæмæ рабæрæг, уыцы адæмы нымæц фæфылдæр 17%. Арæхдæр сæм рабæрæг вæййы ног штамм Омикрон. Сергей Меняйло фæсидт Фæлхасгæнджытæм цæстдарды управленийы амынддзинæдтæ куыд æххæстгонд цæуынц, уымæ уæлдай хъус æрдарын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv