Сергей Меняйло фембæлд РЦИ-Аланийы æнæниздзинад хъахъхъæныны министры хæстæ рæстæгмæ æххæстгæнæг

Республикæйы медицинон кусджытæн мызд куыд фидыц, хостæй ифтонггонд куыд цæуынц адæм. Уыцы фарстатыл Сергей Меняйло æрныхас кодта регионы æнæниздзинад хъахъхъæныны министры хæстæ рæстæгмæ æххæстгæнæг Годжыцаты Тамерланимæ. Сергей Меняйло куыд фæнысан кодта, афтæмæй медицинон къабаз республикæйæн у сæ раззагдæртæй иу. Æмæ уæлдай æргом аздахын хъæуы специалистты мыздмæ. Регионы сæргълæууæг разы нæу, цы системæмæ гæсгæ йæ нымайынц, уымæй. Ис дзы хъæндзинæдтæ. Сæ фæлтæрддзинад, стæй ахуыргонды къæпхæнмæ гæсгæ исынц мызд специалисттæ æви нæ? Уыцы фарстамæ Сергей Меняйло бахæс кодта уæлдай æргом аздахын. Уыимæ ма, фæбæрæг кодта, дзуапдæттæг министрад лæмбынаг хъуамæ æркæса районты цæрджыты курдиæттæм. Уæлдайдæр та, тагъд медицинон æххуысмæ бирæ рæстæг æнхъæлмæ кæсын кæй бахъæуы, уый фæдыл. Службæйы нæ фаг кæны хæтдулгæтæ дæр. Фарстатæ æвæстиатæй райхалын хъæуы. Ныхас ма цыд, хостæй республикæйы цæрджытæ куыд ифтонггонд цæуынц, ууыл. Сергей Меняйло фæбæрæг кодта уый, æмæ регионы дæрддзæф хъæуты цæрджыты дæр хъуамæ æнæ къуылымпытæй ифтонг кæной хостæй. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv