Цæгат Ирыстонмæ кусæг балцы ссыд Уæрæсейы экономикон рæзты министры хæдивæг Сергей Назаров

Цæгат Ирыстонмæ кусæг балцы ссыд Уæрæсейы экономикон рæзты министры хæдивæг Сергей Назаров. Фыццаджыдæр бабæрæг кодта мемориалон комплекс «Зæдты сахар» æмæ Беслæны 1-æм скъолайы спортивон зал. Министры хæдивæг æркаст Беслæны æмæ Михайловскæйы скъолаты арæзтад æмæ рацарæзтмæ. Беслæны 550 бынатæн цы ног скъола аразынц, уый уыдзæн егъаудæртæй иу. Куыстытæ федта республикæйы сæргълæууæджы хæстæ æххæстгæнæг Сергей Меняйло æмæ Уæрæсейы экономикон рæзты министры хæдивæг Сергей Назаров. Бæстыхай байгом кæндзысты ацы аз декабры. Уый руаджы Беслæны 2-æм скъолайы ахуырдзауты кæлæтдзаг бæстыхайæ ракæндзысты ног райдзаст кълæстæм. Проекты фæрцы фæзындзæн уæлæмхасæн ахуырадон æмæ куысты бынæттæ. Михайловскæйы скъола та ныртæккæ кæнынц цалцæг. Зæронд къултæ райхæлдтой, баивтой бæстыхайы сæр. Специалисттæ уадзынц хъæугæ хæтæлтæ. Рацарæзты кæрон скъолайы ахуыр кæныны фадат уыдзæн 710 адæймагæн. Ахсджиаг социалон объектты æркасты фæстæ уыд сæрмагонд æмбырд. Йæ архайджытæ дзырдтой Цæгат Ирыстоны райрæзты къæпхæнтыл. Фыццаджыдæр бæстонæй æххæст кæнын хъæуы нацпроекттæ - фæнысан кодта Сергей Меняйло. Сергей Назаровы хъуыдымæ гæсгæ, республикæйы рæзтæн æххуыс кæнын хъæуы чысыл æмæ рæстæмбис амалхъомадæн. Мæскуыйы делегаци дарддæр араст Мамысоны курортмæ. Уым аив кæнынц туннель. Йæ руаджы туристон-рекреацион комплексмæ ссæуæн уыдзæн тагъддæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv