Медицинон кусджытæ Хутиты Зæлинæ æмæ Битарты Анжелæ æххуыс кодтой коронавирусы рынчынтæн

Коронавирусы низы рæстæг рынчынтимæ цы терапевттæ куыстой, уыдон фæстæмæ сæ куысты бынæттæм рацыдысты. Дохтыртæ цалдæр мæйы дзæбæх кодтой уæззау рынчынты, архайдтой, цæмæй адæмыл низ ма фæтых уа, ууыл. Цардысты санаториты, æмæ цасдæр рæстæг нæ федтой сæ бинонты. Хутиты Залинæ æмæ Битарты Анжелæ каст фесты Цæгат Ирыстоны медицинон институт. Сты терапевттæ. Кусынц Октябрьское хъæуы бынæттон поликлиникæйы. Æрæджы ма хъуыды дæр нæ акодтаиккой, уæззау рынчынты дзæбæх кæнын кæй райдайдзысты, ууыл. Уæлдай дæр та, коронарвирусæй рынчын чи у, уыдоны. Куыд нын радзырдтой, афтæмæй сын кæд фыццаг рæстæг зын уыдис, уæддæр хъуыды кодтой адæмы æнæниздзинадыл. Хутиты Зæлинæ, терапевт: «Мæнæн мæ куыст цæхгæрмæ фæивта. Раст зæгъгæйæ, хъуыды дæр нæ акодтаин, ахæм рынчынтимæ кæй кусдзынæн, ууыл. Коронавирусæй рынчын чи уыд, уыдон бирæ уыдысты. Бон-иу нæм куы 5, куы 10 адæймаджы бахауд. Нæ бон цы уыд, уымæй æххуыс кодтам. Уыдис ныл сæрмагонд дзаумæттæ. Алчидæр дардта æрмкъухтæ æмæ маскæтæ». Æрмæст Зæлинæйæн нæ аивта йæ куысты фæткæвæрд, фæлæ бирæ æндæр дохтыртæн дæр. Стыр зæрдæ чи нæу, æмæ йæ ныфс чи бахаста ацы ахсджиаг хъуддагмæ, уыдон иууылдæр ацыдысты сæрмагонд ахуыртæ. Цыбыр д рæстæгмæ базонгæ сты медицинæйы ног къабазимæ. Зæгъæн ис, æмæ ацы дохтырты цард бынтондæр фæивта. Битарты Анжелæ, терапевт: «Æз уымæй размæ коронавирусæй рынчын чи уыд, уыдонимæ никуы куыстон. Фæлæ нын уæззау рынчынтæм фæкæсын куы бахæс кодтой, уæд æнæдызæрдыгæй ацыдтæн. Рынчынтæн тынг зын уыдис ацы низимæ тох кæнын, фæлæ архайдтам, цæмæй сын фенцонлдæр уа». Цæгат Ирыстоны рынчындонты коронавирусы низы ныхмæ цы дохтыртæ куыстой, уыдоны нымæц гыццыл нæу. сæ фылдæр цардысты санаториты, бинонтæй дард, фæлæ сын сæйрагдæр уыд адæмы æнæинздзинад. Битарты Анжелæ, терапевт: «Ныртæккæ адæм, хъыгагæн, не ’мбарныц, æнæниздзинад сæйрагдæр кæй у, уый. Коронавирусы низ ничи æрхъуыды кодта, мæнг низ дæр нæу. Хъæуы æрмæстддæр бахъуаджы рæстæг дохтыртæм фæдзурын». Хутиты Залинæ æмæ Битарты Анжелæ райстой бирæ ногдзинæдтæ. Базонгæ сты уæззау рынчынты низты сусæгдзинæдтимæ. Кæд раздæр терапевттæ уыдысты, уæд ныр сæ дæсныйады къабæзтæ фæфылдæр сты. Поликлиникæйæ уæлдай ма сæхи бафæлвæрдтой стационарты дæр. Сты дæнцæгæн хæссинаг, медицинæйы нырма фыццаг къахдзæфтæ чи кæны, уыдонæн. Къутæрты Аидæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv