Цæгат Ирыстоны дарддæр æххæстгонд цæуы программæ «Земский доктор»

Цæгат Ирыстоны дарддæр æххæстгонд цæуы программæ «Земский доктор». Курдиæттæ бадæттæн ис ныр дæр. Милуан сомы бæрц фиддон райсын кæй фæнды, уыдоны нымæц афæдзæй-афæдзмæ рæзы. Программæйы тыххæй бæлвырддæр радзурдзæн ме `мкусæг Дзæдзойты Фатимæ. Абон ис нæ студийы æмæ йын ныхасы бар дæттын. Ацы аз программæ «Земский доктор»-ы бацархайыны фадат ис канд дохтыртæн нæ, фæлæ ма медицинон хотæ æмæ акушертæн дæр. Дохтыртæ райсдзысты фиддон 1 милуан сомы, иннæ медицинон кусджытæ та 5 сæдæ мин сомы. Уый специалисттæн у зынгæ æххуыс. Сæйрагдæр та программæйы руаджы республикæйы районты æмæ хъæуты фылдæр кæнынц дохтыртæ дæр æмæ медицинон лæггæдтæ дæр. Афтæ Хæдæрцаты Светланæ сси Алагиры районы Ногхъæуы дохтыр. Амбулаторийы ныридæгæн кусы афæдзæй фылдæр. Уæ зæрдыл уын æрлæууын кæндзынæн, программæ «Земский доктор» Цæгат Ирыстоны æххæст кæнынц 2014-æм азæй. Уыцы рæстæгмæ хъæутæм кусынмæ ацыдысты 50 специалисты. Программæйы домæнтæм гæсгæ, æнæмæнгæй хъæуы бакусын 5 азы. Ныртæккæ программæйы архайынц 26 медицинон кусæджы. Курдиат бадæттæн ис дзуаппдæттæг министрадмæ. Районты фылдæр нæ фаг кæны терапевттæ, педиатртæ æмæ УЗИ-специалисттæ. Программæ «Земский доктор» æххуыс у куыд ног куысты бынæттæ снысан кæнынæн, афтæ ма нæ республикæйы медицинæйы æмвæзад фæуæлдæр кæнынæн. Нæ зæрдæ дардзыстæм, дарддæр дæр хорзырдæм кæй ахаддзæн цæрджыты цардыл. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv