Дзӕуджыхъӕуы хатдзæгтæ скодтой æркаст "Афæдзы ахуыргæнинаг" - ы регионалон къæпхæнæн

Фыццаг бынат - егъау æмæ бæстон куысты фæстиуæг. Сæлбиты Спартак фæуæлахиз «Творческая личность» номинацийы. Бацæттæ кодта прозаикон уацмыс хуымæтæг лæппуйы тыххæй. Конкурсы номырыл бакуыста æппæт лыстæгдзинæдтæ хынцгæйæ. Æргом зæрдæ æмæ йæ æнкъарæнтæ раргом кæнын кæй базыдта, уый тыххæй йын жюрийы уæнгтæ стыр аргъ скодтой.  - Сфæлдыстады фæрцы равдыстон хуымæтæг, æгъдауджын лæппуйы царды тыххæй. Уый фæндыд адæмæн хи равдисын. Æз мæ арæхстдзинад æххæстæй раргом кодтон. Мæнмæ гæсгæ алы актер дæр хъуамæ йæ сурæт фыццаг банкъара æмæ йæ афтæмæй рæгъмæ рахæсса. Æркаст "Ученик года"-йы регионалон къæпхæн республикæйы æппæт районтæй æрбамбырд кодта сæдæ скъоладзауы онг. Уæлахиздзауты хорзæх кæныны кадджын мадзалы онг бахæццæ сты 49 архайæджы. Хуыздæрты номыл тох кодтой 9-11 кълæсты ахуыргæнинæгтæ, сæ куыстытæн та аргъ скодтой фæлтæрдджын жюрийы уæнгтæ. Сывæллæттæ фæлварæнтæ цыдысты 7 номинацимæ гæсгæ. "Афæдзы спортсмен", "Афæдзы бархион", "афæдзы æхсæнадон архайæг", "Афæдзы Сфæлдыстадон адæймаг", "Афæдзы Патриот", "Афæдзы Интеллект", "ахуыргæнинæгты советы афæдзы сæрдар". Алы номинацийы дæр — бæлвырд хæслæвæрдтæ æмæ домæнтæ. Экспертон къамисы уæнгтæ сты æхсæнадон архайджытæ, хицауады минæвæрттæ, профилон ведомствæты кусджытæ. Æркаст цыд дыууæ къæпхæнæй — комкоммæ æмæ фæсаууонмæ. Фыццаг жюри аргъ кодта архайджыты сæрмагонд гæххæттытæн, уый фæстæ - сæ курдиат æмæ сфæлдыстадон гæнæнтæн. Экспертты ныхæстæм гæсгæ, уæлахиздзауты сбæрæг кæнын æнцон нæ уыд: иууылдæр бæстон архайдтой, равдыстой сæ арæхстдзинад. Студент æмæ скъоладзау хицæн кæнынц кармæ гæсгæ. Кæстæртæ ныфсджындæр 'сты, сæхи агурынц, алы ног здæхтыты сæхи фæлварынц. Мæ зæрдæ сын зæгъы, цæмæй æппынæдзух цавæрдæр æркаст, кæнæ уæлахизыл ма хъуыды кæной. Абон куы нæ рамбулай, уæд, æнæмæнг, райсом раззагдæр уыдзынæ. Алцыдæр аразгæ у фæлтæрддзинад æмæ цæттæдзинадæй. Хорзæх кæныны фæдыл кадджын мадзалы архайдта республикæйы ахуырады министры хæдивæг Габеты Вадим. Уый фæнысан кодта ахæм æркастыты ахсджиагдзинад скъоладзауты райрæзтæн æмæ схорзæхджын кодта фыццаг къæпхæны лауреатты. Фæлæ ууыл куыст нæ фæвæййы. Разæй уæлахиздзаутæм æнхъæлмæ кæсы æппæтуæрæсеон къæпхæн, уым сæ бон уыдзæн сæ курдиат æгас бæстæйы раз равдисын.