Кæсагдарæн хæдзарæдты куыстæн Цæгат Ирыстоны аразынц æмбæлгæ уавæртæ

Цæгат Ирыстоны кæсаг дарыны куыст парахат кæны. Республикæйы ацы къабазы куыстуæттæ фæзынд цалдæр районы. Уæдæ сæм хъæууон хæдзарады министрад дæр йе `ргом здахы. Æппæт ахадгæ мадзæлтты фæрцы ивгъуыд азмæ кæсагдарджытæн сæ къухы бафтыд ног æнтыстдзинæдтæ. Сæ зæрдæ дарынц, сæ продукци æлхæнджытæ дæр кæй фæфылдæр уыдзысты. Хæринаг афойнадыл, уыимæ хуымæтæг нæ, фæлæ пайдаджын хойраг дæр. Ацы хæдзарады ис валер кæсаджы 500 мин сæры. Ам ис бассейнтæ æмæ инкубатор еугæфы гагатæн. Къаболаты Хетæг кæсæгты куыст кæны 14 азы. Мичуринойы хъæуæй продукци апарахат вæййы Цæгат Ирыстоны тæрхæджытыл нæ, фæлæ ма сыхаг регионты дуканитыл. Фермер пайда кæны æрмæст нырыккон технологитæй, фæсарæйнаг куыстуæтты фæлтæрддзинад дæр йæ куыстæн у стыр хъомыс. «Кæсаджы лæппынтæ сты Францийæ. Æрмæстдæр нæм ис валеер кæсаджы 500 мин сæры. Зæгъæн ис, æмæ нæ хæдзарад иууылдæр куыстытæ кæны йæхæдæг. Уыцы иу рæстæг æлхæнæм Францийæ ласт еугæф, дарддæр сæ рауайы чысыл кæсæгтæ, куы рахъомыл вæййынц уæд сæ уæз свæййы 300-350 граммы. Уæй дæр сæ фæкæнæм нæхæдæг», - Арыдоны районы кæсагдарæн фермерон хæдзарады разамонæг Къаболаты Хетаг. Ноджы ма иу кæсагдарыны хæдзарад бабæрæг кодтам Кировы районы. Ам цадтæ байдзаг кодтой чысыл кæсæгтæй. Еугæфы гагатæй сæ чысыл кæсæгты онг схастой районы кæсагдарджытæ. Цады фæзуат - 36 гектары. Дон цæуы Теркæй. Æрцардысты æмæ дзы парахат кæндзысты карп, толстолобик æмæ, белый Амур, зæгъгæ, кæсæгтæ. Доны цæрæгойтæм цæуы лæмбынæг цæстдард. Специалистты хъуыдымæ гæсгæ, уыйбæрц чысыл кæсæгты куыст республикæйы никуы кодтой, арæхдæр сæ ластой æндæр регионтæй. Уавæр фæхуыздæр грантты фæрцы. Профилон министрады куыд зæгъынц, афтæмæй фермертæн баххуыс кæныны мадзæлттæ дарддæр дæр агурдзысты. «Кæй зæгъын æй хъæуы, уымæй зæрдæ райы, фæлæ ахæм чысыл куыстуæттæн æхцайы фæрæзтæй баххуыс кæнын у тынг зын. Сæйрагдæр нæм нæй цъынды ист фæрæзтæ, æмæ уымæй тыхсæм. Уымæ гæсгæ сæ авналæнтæ дæр вæййынц къуындæр æмæ хъуыддаг апарахат кæнынмæ æмбæлгæ фадæттæ нæй. Махæй уæддæр цы аразгæ уый кæнæм», - РЦИ-Аланийы хъæууон хæдзарад æмæ хойраджы министры хæдивæг. Æрттиваг карп, валер кæсаг æмæ æндæртæ. Цæгат Ирыстоны ис æппæт фадæттæ кæсаджы куыст кæнынæн. Ныртæккæ куыст цæуы кæсагдарыны селекцион центр саразыныл. Уыцы фарстайы æххуыс кæны федералон агентад. Галина Григорян _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv