Уæрæсейы фæлхасгæнджытæм цæстдарды Цæгат Ирыстоны управленийы кусджытæ снысан кодтой радон рейд

Уæрæсейы фæлхасгæнджытæм цæстдарды Цæгат Ирыстоны управленийы кусджытæ рацыдысты радон рейды. Мадзалы сæйраг нысан – санитарон домæнтæ куыд æххæстгонд цæуынц, уый сбæрæг кæнын. Абалц кодтой æхсæнадон транспорт уынæг æмæ базарадон центртæм. Ахæм рейдтæ æппыæдзух снысан кæнынц республикæйы. Йæ архайджытæ - Уæрæсейы фæлхасгæнджытæм цæстдарды регионалон управленийы специалисттæ, мидхъуыддæгты æмæ транспорты министрадты минæвæрттæ. Зæгъæм, ам, æхсæнадон транспорты, бæрæг кæнынц, маскæтæ дарыны фæтк куыд æххæстгонд цæуы, уый. Ныхас цæуы амалхъом адæмы æмæ, юридикон бæрнондзинад кæмæ ис, уыдоны ивартыл. Барадхæлдтытæ арæх куы уой, уæд, гæнæн ис, æмæ сæ куыст рæстæгмæ урæд æрцæуа. Кæнæ та ивар фиддзысты 2 сæдæ мин сомæй 5 сæдæ мин сомы онг. Амалхъом адæймагæн та 50 мин сомæй 150 мин сомы онг. Уый хауы æхсæнадон транспорты маскæтæ дарыны фарстамæ дæр. Дзуапдæттæг ведомствæты минæвæрттæ республикæйы цæрджытимæ арæх кæнынц профилактикон ныхас. Се ’ргом здахынц, бирæ адæм кæм сæмбырд вæййы, уыцы бынæттæм. Зæгъæм, базарадон центртæ. Бынаты раиртасынц, дезинфекцигæнæн гæрзтæ æмæ дзы маскæтæ ис, уый. Райсомæй сбарынц кусджыты буары тæвд, алфамблæйттæ дезинффекци скæнынц. Социалон дистанцийы тыххæй дæр нæ рох кæнынц. Специалисттæ куыд зæгъынц, афтæмæй республикæйы цæрджытæ уавæр æмбарынц. Базарадон центрты уагæвæрдтæ æххæст кæнынц. Ацы бонты Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло фехъусын кодта, коронавирусы ныхмæ уагæвæрдтæ кæй фæкарздæр кодтой, уый тыххæй. Ахæм фæтк фидар кæнын бахъуыд, эпидемиологон уавæр æвзæрдæр кæй кæны, уымæ гæсгæ. Мониторинг дæр æнæрлæугæйæ кæндзысты. Специалисттæ сидынц адæммæ, цæмæй се ’нæниздзинадмæ лæмбынæгдæр кæсой æмæ къæрцхъусдæр уой. Пелиты Сабинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv