Техникон лæггæдтæй пайда кæныныл бадзырд бафыссын чи нæ разы кæны, уыдоны газы хæтæлтæ сæхгæдтой

Дзæуджыхъæуы газы хæдзарады бæрнон кусджытæ æмæ Æнæнхъæлæджы уавæрты министрады регионалон хайады минæвæрттæ сарæзтой иумæйаг рейд. Хи хæдзæртты сбæрæг кодтой газы гæрзты уавæр. Æркастысты газы прибортæм, пецтæ хæтæлтæм куыд æфтыд сты, уымæ, стæй вентиляци цас хорз у, уыдæттæм. Специалисттæ ма цæрджытæн æмбарын кодтой, газы прибортæй раст пайда кæнын куыд хъæуы, уый. Рейды архайæг бæрнон кусджытимæ уыд нæ уацхæссæг Дзæдзойты Фатимæ дæр. Æрыдойнаг уынджы нæ разы кæнынц хæдзары техникон лæггæдтæй пайда кæныныл. Газы компанийы специалисттæ цæрджытæн раздæры рейдты рæстæг æмбарын кодтой, æдасдзинады домæнтæ æххæстгæнгæйæ, газы гæрзты уавæр сбæрæг кæнын кæй хъæуы. Æмбæлы техникон лæггæдты тыххæй бадзырд бафыссын дæр. Фæлæ уыдон закъоны сæрты ахызтысты. Уый фæдыл сын сæ газы хæтæлтæ сæхгæдтой. Галковскийы номыл уынджы хæдзæртты цæрджытæй æнæ ахæм бадзырдтæй чи ис, уыдоны хыгъд нысангонд у. Фæлæ специалисттæ газы кусæнгæрзты техникон æдасдзинад сбæрæг кæнынмæ куы æрбацыдысты, уæд сын цæрджытæ дуар нæ байгом кодтой. Æдасдзинады домæнтæ не `ххæст кæнгæйæ, адæймаджы æнæниздзинадæн стыр зиан æрхæссæн ис, фæбæрæг кодта Цæгат Ирыстоны æнæнхъæлæджы цауты управленийы хайады кусæг Æвзургуыты Дзерассæ. Афтæмæй, профилактикон мадзæлттæ ахсджиаг сты æнæнхъæлæджы цаутæ ма ’руадзыны тыххæй. Æрвылаз Цæгат Ирыстоны газæй хъыгдард баййафынц дæсгай адæймæгтæ. Зынгсирвæзтытæ дæр æрцæуы. Хъыгагæн, уæззау фæстиуджытæм расайынц. Æвирхъау цаутæн та сæ аххоссаг иу у: газы кусæнгарз æмæ йæ ифтонгадмæ куыдфæндыйы цæстæй кæй кæсынц, уый. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv