Уырыссаг æмæ Ирон Академион театрты кæронмæ æрхæццæ театралон сезон

Театрдзаутæн загътой «Нæ ног фембæлдмæ!» Цæгат Ирыстоны театралон сезон кæронмæ æрхæццæ. Ацы аз сæ къæбицтæ фæхъæздыг сты алыхуызон цымыдисаг спекталтæй. Куыстой æвæллайгæйæ. Уый тыххæй та сын аивадуарзæг кодта уæлдай аргъ. Фидæнмæ артисттæ цавæр пълæнттæ æвæрынц сæ размæ? Бæлвырддæр нæ дарддæры æрмæджы. «Зæххон хуыцæуттæ» æвдисы Фыдыбæстæйы стыр хæсты заманы сылгоймæгты уды фидардзинад. Уыцы рæстæг бирæ зындзинæдтæ бавзæрстой. Цалынмæ сæ дарджытæ хæсты уыдысты, уæдмæ иунæгæй хъомыл кодтой сæ цоты, кастысты зæрæттæм æмæ уыимæ кодтой нæлгоймаджы куыстытæ дæр. Фæлæ æппæт зындзинæдты сæрты сыгъдæг зæрдæимæ æмæ кадимæ ахызтысты. Уый тыххæй сæ Гаглойты Владимир йæ драмæйы рахуыдта «зæххон хуыцæуттæ». Театрдзаутæн рæстæгмæ хæрзбон æнкъардæй загъд æрцæуы. Фæлæ Уалыты Гиви куыд загъта, афтæмæй театры дæр фæхъæуы баулæфын. Спектакль бабæрæг кодтой нæ республикæйы сæргълæууæджы хæстæ рæстæгмæ æххæстгæнæг Сергей меняйло æмæ культурæйы министры хæстæ æххæстгæнæг Къубалты Эльбрус. Уый тынг æхсызгон уыд аивадуарзджытæн æмæ артисттæн дæр. Театралон сезоны кæронбæттæнмæ актертæ æрбамбырд сты иуылдæр. Фыццаг премьерæ уыд фæззæджы – «Ричард III». Шекспиры трагеди Ирон театры сценæйæ ацы сезоны айзæлд фыццаг хатт. Йæ режиссер Уалыты Гиви. Бахастой йæ Национ театрты æппæтуæрæсеон фестивалы хуыздæр спектакльты хыгъдмæ. Æгас 85-æм сезоны дæргъы премьерæ премьерæйы ивта. Æдæммæтæй уыдысты 7. Классикæ чи уарзы, уыдонæн Антон Чеховы «6-æм палатæ», сабитæн «Бременаг музыканттæ». Ирд æмæ зæрдæмæхъаргæ рауад «Ромео æмæ Джульеттæ» дæр. Ацы сезон бирæ æрыгон артисттæн байгом кодта фæнждаг Ирон театры сценæмæ. Театралон сезон кæронмæ æрхæццæ Евгений Вахтанговы номыл Уырыссаг академион театры дæр. Театрдзауты ныхæстæм гæсгæ, ирд æмæ цымыдисаг рауад. Æнкъард кæнынц, сæ уарзон актертæн сæ рæстæгмæ хæрзбон зæгъын кæй хъæуы, уый тыххæй. 150-æм театралон сезоны кæронбæттæнмæ ам сæвæрдтой Антон Чеховы комеди «Леший». Залы къух бакæнæн дæр нæ уыд. Спектаклы сæвæрдта Болгариаг режиссер Богдан Петканин. Æвдисы адæймаджы удыхъæд, йæ зæрдæ куыд дары рухс, амондджын фидæныл. Театр та цыбыр улæфты фæстæ æнхъæлмæ кæсдзæн йæ аивадуарзджытæм, цæмæй та сæ ногæй сцымыдис кæна ирд спектакльтæй. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv