Петербурджы æрхъуыды кодтой Кучиты Юрийы номимæ баст ног туристон балцвæд

Æнæмæнг, æхсызгон æмæ сæрыстырдзинады хос. Петербурджы æрхъуыды кодтой туристон ног балцвæд. Ирыстонмæ цы бар дары, зæгъгæ, исчи куы бафæрса, уæд нæ дзуапп - цæттæ. Ахæм бар æмæ баст у нæ зындгонд æмзæххон, атомон ихсæттæг нау «Арктикæ»-йы капитан Кучиты Юрийы номимæ. Уый тыххæй хъусын кæны информацион портал «15 Регион» Арктикæйы хъуыддæгты Санкт-Петербурджы комитеты пресс-службæйыл æнцайгæйæ. Балцвæды ном хуыйны «Герои арктических льдов: лица русской Арктики», зæгъгæ. Пресс-службæйы куыд фæнысан кодтой, афтæмæй туристтæ базондзысты Уæрæсейы цæгатагдæр бынæттæ иртасыны куысты сусæгдзинæдтæ. Радзурдзысты сын, æнусон ихты хъæздыгдзинæдтæ базонынæн йæхи чи не `вгъау кодта, уыдоны тыххæй. Æнæмæнг, се `хсæн ирдæй бæрæг дары арктикон капитан Кучиты Юрийы ном дæр. Куыд зонут, афтæмæй уый æппæты фыццаг уæлдондзæуæг ихсæттæг науыл бахæццæ Цæгаты полюсмæ. Уымæй уæлдай ма уазджытæн дзурдзысты, Уæрæсейы наутæ аразыны куысты стыр æвæрæн чи бахаста, уыцы Алексей Крылов, стæй Цæгат полюсы сæрты æнæрбадгæйæ чи атахт, уыцы тæхæг Валерий Чкаловы нæмттæ дæр. Балцвæдмæ йæ саразджытæ бахастой 60 кадджын бынат æмæ объектæй фылдæр. Бафтаудзыстæм ма уый, æмæ Зæххы къорийы меридиантæ кæм баиу вæййынц, уыцы ранмæ атомон ихсæттæг нау «Арктикæ»-йы капитан Кучиты Юрий йæ къордимæ бахæццæ 1977 азы, августы. Арæх уыцы цау абарынц Юрий Гагарины фыццаг космосон балцимæ. Егъау уыд Кучиты Юрийы балцы практикон нысаниуæг дæр. Стыр пайда фæцис Арктикæ иртасыны куысты, стæй Цæгатаг Денджызон фæндагыл наутæ уадзыны куыстæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv