Цæгат Ирыстоны фæнзындзæн альпинизмы рæзты программæ

Цæгат Ирыстоны фæнзындзæн альпинизмон туризмы рæзты программæ. Йæ саразыны тыххæй хæслæвард радта республикæйы сæргълæууæг Битарты Вячеслав. Ныртæккæ альплагерты инфраструктурæ заууат уавæры ис. Уымæ гæсгæ, альпинисттæ æрбынат кæнынц сыхаг регионты. Республикæйы та ис бирæ фадæттæ ацы къабаз апарахат кæнынмæ. Бæлвырддæр хабæрттæ, нæ дарддæры æрмæджы. Хæмыцаты Хъазыбег ма йæ хорз хъуыды кæны, фæлладуадзæн базæ «Таганрог»-æн ивгъуыд æнусы йæ уынд цы хуызæн уыди, уый. Æртæ азы дæргъы йæм фæнгдаг арæзтой. Æмæ йæ альпинисттæ уæд дæр уыдтой, иннæ бынæттимæ абаргæйæ, уæлдæй æндæрхуызон у, уый. Æмæ ацы бынат кæй равзæрстой, уымæй нæ фæрæдыдысты. 1970 азы дзы Таганрогы радио-техникон институт райдыдта лагерь аразын. Специалисттæ куыд зæгъынц, афтæмæй альпинизмæн хуыздæр бынат ссарæн нæй. Хæмыцаты Хъазыбеджы хонынц Цæгат Ирыстоны альпинизмы бындурæвæрæг. Таганрогы базæ йæ зæрдæйы ахсы стыр бынат. Альпинизмы фыццаг разряд райсын Хъазыбегæн бантыст Цъæйы. Спорты мастер та сси Дыгургомы. Казбек Хамицаев, президент федерации альпинизма РСО-Алания: «Ам фенæн ис, фыццæгæм къордмæ чи хауы, ахæм æнцон цъуппытæ, æмæ зындæр бæрзæндтæ, æхсæзæм къæпхæны онг. Суанг ма лаборатори дæр байгом кодтам хæхты. Альпизмæн дзы æппæт уавæртæ дæр ис - мит дæр, их дæр». Ныртæккæ базæйæ фылдæр пайда кæнынц фæллад уадзæн бынаты хуызы. Бæстæйы æппæт регионтæй йæм ссæуынц туристтæ. Спорстментæ дæр сæ тренировкæтæ ам кæнынц. Фæлæ дзы альпинизмæй архайынмæ секци нæй. Хицæн къордтæ сæ фæндаг акæнынц хæххон балцвæдтыл. Базæйы директор Александр Цымбал куыд зæгъы, афтæмæй республикæйы альпинизмы рæзтыл æнæмæнг бакусын хъæуы. Александр Цымбал, директор спортивной базы «Таймази»: «Архайын уал хъæуы сывæллæттимæ. Сæйрагдæр уал у туризм. Стæй та уæд хæхтыл бырыныл ахуыр кæнын. Райдайæн уал ис 10-15 метры бæрзæндæй. Уый фæстæ та рахизæн уыдзæн альпинизммæ дæр. Тынг бирæ адæм мæлы. Мæ уый цæмæн у афтæ? Уымæн æмæ сæм фаг зонындзинæдтæ æмæ арæхстдзинад нæй». Альпинизмы рæзтыл ма æмбырды ныхас кодта Битарты Вячеслав. Куыд фæбæрæг кодта, афтæмæй советон дуджы тынг парахат уыди уыцы къабаз Цæгат Ирыстоны. Æппæт дунейæ альпинисттæ цыдысты республикæйы цъуппытæм схизынмæ. Ныртæккæ альплагеры инфрастуктурæ ис заууат уавæры. Хæххон фæндæгтæм хъæуы базилын, альплагерьтæ æмæ фысымуаттæ саразын, ирвæзынгæнджыты посттæ сифтонг кæнын. Уыимæ ма, республикæйы профессионалон альпинисттæ бирæ кæй нал базззад, уымæ гæсгæ хъæуы ногты цæттæ кæнын. Битарты Вячеслав бахæс кодта хæстæгдæр рæстæг ног сæрмагонд программæйыл бакусын. Цæгат Ирыстон бабæрæг кодта Уæрæсейы альпинизмы федерацийы вице-президент Иван Душарин. Арæзт æрцыд кусæг къорд. Йæ уæнгтæ сты республикæйы альпинизмы федерацийы минæвæрттæ æмæ Битарты Вячеславы æхсæнадон æххуысгæнджытæ. Специалисттæ бакусдзысты райрæзты программæйыл. Баххуыс сын кæндзысты бæстæйы альпинизмы федераци æмæ республикæйы хицауад. Иван Душарин куыд зæгъы, афтæмæй Цæгат Ирыстоны æрдзон уавæртæн æмбал нæй. Иван Душарин, вице-президент федерации альпинизма России: «Ацы ком мæ дисы бафтытда. Тынг цымыдисаг æмæ аив у. Уæрæсейы альпинизмы федерацийы президентимæ дæр ныхас кодтон. Мæ балцыл сразы ис. Амынддзинæдтæ мын радта. Программæйыл хъæудзæн бакусын. Мæнæ уал ныр кæнæм фыццаг къахдзæфтæ». Альпинизм сног кæнын у Цæгат Ирыстоны туризмы рæзтыл бакусыны стратегийы хай. Битарты Вячеслав бирæ хатты фæбæрæг кодта, туризмæн регионы стыр ахадындзинад кæй ис, уый. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv