РЦИ Аланийы поликлиникæтæ медицинон æххуыс кæнынц нысангонд фæткмæ гæсгæ

Цæгат Ирыстоны поликлиникæтæ кусын райдыдтой фæткмæ гæсгæ. Сæйраг домæн - æнæмæнг санитарон домæнтæ æххæст кæнын. Дзæбæхгæнæндонмæ бахизæны алкæмæндæр сæ къухтæ ныссæрфынц сæрмагонд таддзагæй. Сбарынц сын сæ буары тæвд. Пациенттæй коронавирус кæмæ уыд, уыдонмæ цæуы уæлдай цæстдард. Бæлвырддæр нæ дарддæры æрмæджы. Дзæбæхгæнæндонмæ бахизæны æрвылбон рад хæссы дохтыр. Æнæмæнг кæнинаг процедурæтæ - къухты дезинфекци æмæ буары тæвд сбарын. Поликлиникæ кусын райдыдта æмбæлгæ фæткмæ гæсгæ, æрмæст æдасдзинады домæнтæ æххæстгæнгæйæ. Бæстыхæйтты кæнынц дезинфекци. Алы кусæнуат дæр пациенты фæстæ сыгъдæг кæнынц. Дзæбæхгæнæндоны архайынц, цæмæй адæм бирæгæйттæй ма æмбырд кæной. Уымæ гæсгæ ацæргæ адæм æмæ сывæллæтты регистратурæты рагагъоммæ снысан кæнынц номхыгъд. Поликлиникæйы ма скодтой сæрмагонд журнал. Уым алы пациенты тыххæй дæр хъусынгæнинæгтæ. Бæлвырддæр дзургæйæ, республикæмæ чи сыздæхт æмæ COVID кæмæ рабæрæг, ахæм рынчынтимæ хæстæгмæ ныхас кодта æви нæ, уый. Уыцы информацимæ сæ хъус дарынц, пациент куы ’рбацæуы дохтырмæ, уæд. Дзæбæхгæнæндоны куыд бафиппайдтой, афтæмæй алы профилы специалисттæм дæр стыр рад ис. Иу бонмæ дохтыртæ æркæсынц 80 адæймагмæ. Ныртæккæ ныхас цæуы, æрмæст амбулаторон æххуысыл нæ, фæлæ ма пациентты рынчындоны æвæрыны хъуыддагыл дæр. Æвæстиатæй сидæм, рынчынтæй пъланмæ гæсгæ хъуамæ хи чи дзæбæх кодтаит, уыдонмæ. Хъæуы сын бæстон иртасæнтæ саразын. Уый та уымæн æмæ низ ма парахат кæна. Пациентты нымæц дзæвгар фæфылдæр. Хи ныффысæн ис специалисттæм. Дохтыртæ зæрдыл лæууын кæнынц, республикæйы дарддæр æххæстгонд цæуы маскæтæ дарыны фæтк. Вирусыл æххæстæй нæма фæтых стæм, æмæ уымæ гæсгæ, поликлиникæйы уæвгæйæ, хи хъахъхъæныны домæнтæ æххæст кæнын хъæуы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv