Цæгат Ирыстоны медицинон куыстуæттæ 'здæхынц куысты нысангонд фæткмæ

Цæгат Ирыстоны медицинон куыстуæттæ сабыргай 'здæхынц куысты нысангонд фæткмæ. Се 'хсæн Республикон клиникон рынчындон æмæ эндокринологон диспансер дæр. Хæцгæ низ йæ тæккæ цырены куы уыд, уæд республикæйы Æнæниздзинад хъахъхъæныны министрады уынаффæмæ гæсгæ, низджынты раивтой ацы рынчындæтты бæстыхæйттæм. Ныр низ фæсаст æмæ дзæбæхгæнæндæттæ кусынц раздæры фæткмæ гæсгæ. 3-æм мартъийæ фæстæмæ эндокринологон диспансеры талон райсæн ис дохтыртæм се 'ппæтмæ дæр. Исæн æмæ иннæ хайæдтæ кусын райдыдтой æрвылбоны фæткмæ гæсгæ. Фæлæ уæддæр æххæст кæнын хъæуы санитарон домæнтæ. Уый тыххæй адæммæ сидынц рынчындоны дохтыртæ дæр. Фарон, коронавирусы низ йæ тæккæ цырены куы уыд, уæд республикæйы Æнæниздзинад хъахъхъæныны министрады уынаффæмæ гæсгæ, низджынты иу хай раивтой ацы бæстыхаймæ. Эндокринологон хайад та рæстæгмæ æрбынат кодта Дзæуджыхъæуы 1-æм арæндоны. Уым дæр медицинон æххуыс иу бон дæр не 'рлæууыд. Ивгъуыд къуыри, сæ куыст бынатмæ куы раивтой, уæд ардæм рацыдысты дарддæр сæхи дзæбæх кæнынмæ 43 рынчыны дæр. Æхсызгон сын у ацы хъуыддаг. Алчидæр йæхи бынаты куы уа, уæд хуыздæр у. Уæдæ рынчындоны ис ныртæккæ кæй райстой, ахæм пациенттæ дæр. Уыдон та сты 7-æй. Бирæтæ сæ æнхъæлмæ кастысты, æмæ цалынмæ диспансер йæ куыст ногæй йæхи бынатмæ нæ раивта, уæдмæ дзæбæхгæнæн курс скæнынмæ не 'рбацыдысты. Стационары эндокринологон хайады разамонæджы ныхæстæм гæсгæ сын фæстæмæ сæхи бынатмæ рахизыны фадат кæй фæци, уый ахсджиаг хъуыддаг у. Фыццаджыдæр æнæниздзинады тыххæй. Уымæн æмæ ам ис æппæт уавæртæ сæрмагондæй эндокринологон низтæ бæрæг кæнынæн. Суанг дзæбæхгæнæн гимнастикæ кæмæн рафыссынц дохтыртæ, уымæн дæр æй диспансеры йæ бон у кæнын. Ныртæккæ республикæйы эндокринологон низтæй сæйы 57 мин адæймаджы. Уыдонæй - 20 минмæ ис сæкæрниз. Се 'хсæн 270 сывæллоны. Фæстаг рæстæг сæ нымæц зынгæ фæфылдæр. Уымæн йæ аххосаг у, специалистты ныхæстæм гæсгæ, коронавирсы низ сæхиуыл кæй банкъардтой, уый. Пъланмæ гæсгæ, февралæй кусы Республикон клиникон рынчындон дæр. Эпидемиологон уавæр хуыздæр кæны, æмæ коронавирусæй чи фæрынчын, уыдонæй æппæты нæ бахъæуы рынчындоны медицинон æххуыс. Раздæр цы хайæдтæ бацæттæ кодтой COVID-пациенттæн, уыдон фæстæмæ сæ куыст фæткмæ гæсгæ кæнынц. Коронавирусæй рынчынтæй дзæбæхгæнæндоны медицинон æххуыс кæй бахъæуы, уыдонæн ам сæрмагондæй ныууагътой дыууæуæладзыгон бæстыхай. Ныртæккæ дзы ис 35 адæймаджы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv