Дзæуджыхъæуы сарæзтой куклатæ æмæ хъазæнты армукъа

Культурæйы галуан «Металлург»-ы байгом ис адæмон æрмдæсныты армукъа «Душа женщины», зæгъгæ. Сæ куыстытæ дзы равæрдтой 50 адæймагæй фылдæр. Сты Ирыстоны алы рæттæй. Армукъайы фенæн ис алы хуызы куклатæ: хъуымацæй, керамикæйæ æмæ ма суанг бæмбæгæй конд хъазæнтæ дæр. Æппæтæй тынгдæр æрбацæуджыты дисы бафтыдтой Дыгуры æмæ Мæздæджы районты æрмдæснытæ. Адæмы зæрдæмæ тынг фæцыдысты. Цæмæн, уый та ныртæккæ базондзыстут. Сылгоймæгты кадæн арæзт армукъа æрбамбырд кодта, Ирыстоны тæккæ курдиатджындæр чи у куклатæ æмæ хъазæнтæ аразынмæ, уыцы дæсныты. Сæ иу - Наталья Боровицкая. Мæздæккаг æрмдæсны дисы æфтауы йæ куыстытæй. Армукъама бацæттæ кодта æнахуыр куклатæ. Сты аив æмæ зын техникæмæ гæсгæ арæзт. Æркаст аразджытæ куыд бафиппайдтой, афтæмæй иннæ куыстыты `хсæн ирдæй бæрæг дарынц. Куклатæ конд сты алы жанрты: портреттæ, фантазион æмæ этникон хуызты. Алы дæсны дæр йæ куысты йæ уды хай цыма ныууагъта, раст афтæ кæсы адæймагмæ. Армукъайæн йæ ном - йæ уæлæ, «Душа женщины», зæгъгæ. Любовь Пушкарёва аразы нывтæ æрдзон æрмæджытæй. Дуртæй, къуызыртæй сфæлыста Къостайы райгуырæн бæстæ. Национ хуызы конд гауызтæ дæр уыдис фенæн армукъайы, уыдон дæр сты цымыдисаг. Битарты Верæ та уафы, гобелен кæй хонынц, ахæм нывтæ. Суанг ма æндæхтæй быд зонтыччытæ дæр сарæзтой. Æрмдæсны Наталья Стасенко та ахуырдзаутæн раргом кодта бæмбæгæй конд хъазæнты сусæгдзинæдтæ. Æгайты Фатимæ йæ сæйраг хæсыл нымайы, нæ рагон культурæ æмæ традицитæй рохуаты цы баззад, уыдон адæмы зæрдыл йæ куыстыты руаджы æрлæууын кæнын. Аразы алыхуызон куклатæ. Фатимæ йæ дæсныйады сусæгдзинæдтæ æмбæхстæй нæ дары. Æргом сæ кæны, кæй фæнды, уыдонæн. Ахæм ахуыргæнинæгтæ та йын бирæ ис. Фатимæ сын саразы сæ куыстыты равдыстытæ. Фидæнмæ дæр æм бирæ пълæнттæ ис. Куклатæм бакæсынмæ æрбацæуынц стырæй-чысылæй. Кæй зæрдæмæ нæ фæцыдысты, ахæм адæймаг нæй. Алкæй дæр сæ бафæнды баныдзæвын, къухæй сæ басгарын. Фæлæ йæ `мбарынц, ацы аивадон хæзнатæ хъазынæн кæй не сты, уый. Сты рæсугъддзинад æмæ курдиаты `вдисæнтæ. Саулохты Ланæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv